काठमाडौंः प्रतिनिधिसभा सदस्य, प्रदेशसभा सदस्य र स्थानीय तहको रिक्त ५२ पदको उपनिर्वाचनका लागि शनिबार बिहान ७ बजेदेखि मतदान सुरु भएको छ । देशका विभिन्न स्थानमा भइरहेको उपनिर्वाचनलाई स्वच्छ, स्वतन्त्र, निष्पक्ष, विश्वसनीय र भयरहित वातावरणमा निर्वाचन सुरु भएको निर्वाचन आयोगले जनाएको छ ।
उपचिर्वाचनमा ३३७ उम्मेदवारले भाग लिइरहेका छन् भने ४ लाख ५४ हजार ११४ ले मतदान गर्दैछन् । प्रतिनिधिसभातर्फ २१, प्रदेशसभा सदस्य तर्फ ४३ र स्थानीय तहका विभिन्न पदका लागि २७३ उम्मेदवार चुनावी प्रतिस्पर्धामा छन् । यस उपनिर्वाचनमा ४ लाख ५४ हजार ११४ जनालाई मतदान गर्न पाउने मताधिकार छ । सबै सुरक्षा निकायको समन्वय र सहभागितामा उपनिर्वाचन लक्षित भरपर्दो एकीकृत सुरक्षा योजना बनाइएको आयोगले उल्लेख गरेको छ ।
अपाङ्गता भएका व्यक्ति, गर्भवती, सुत्केरी, ज्येष्ठ नागरिक, अशक्त वा बिरामी मतदातालाई प्राथमिकता दिई मतदान गर्न पाउने उचित प्रबन्ध मिलाउन पनि आयोगले सबै मतदान अधिकृतलाई निर्देश दिएको छ । निर्वाचन कानूनले अनुमति दिएका उम्मेदवार, मतदाता, व्यक्ति वा अधिकारीबाहेक अन्य कुनै पनि व्यक्ति मतदान केन्द्रमा प्रवेश नगर्न सुझाव दिँदै आयोगले मतदाताले स्वतन्त्र र विवेकपूर्ण ढङ्गबाट मतदान गर्न पाउने नैसर्गिक अधिकारको सम्मान गर्न र सहज वातावरण तयार गरिदिन अनुरोध गरेको छ ।
कास्की–२ मा प्रतिनिधिसभा सदस्य, भक्तपुर, बागलुङ र दाङमा प्रदेशसभा सदस्य तथा धरानमा उपमहानगरपालिकाको प्रमुख पदका लागि उपनिर्वाचन हुन लागेको हो । पाँचथरको फाल्गुनन्द गाउँपालिका, सङ्खुवासभाको मकालु गाउँपालिका र महोत्तरीको पिपरा गाउँपालिका अध्यक्षका लागि पनि उपनिर्वाचन हुँदैछ । हुम्लाको खार्पुनाथ गाउँपालिकाको उपाध्यक्ष र ४३ वडाध्यक्ष पदका लागि उपनिर्वाचन हुन लागेको हो । यसैबीच भक्तपुरको चाँगुनारायण–२ दुवाकोट मतदान केन्द्रमा भएको मतदानको प्रमुख निर्वाचन आयुक्त दिनेशकुमार थपलियाले अवलोकन गरेका छन् ।
गण्डकी प्रदेशकाे कास्की २ बाट निर्वाचित रवीन्द्र अधिकारीकाे हेलिकप्टर दुर्घटनामा परी निधन भएका कारण उक्त क्षेत्र खाली भएकाे थियाे । यसैगरी प्रदेशसभा सदस्यहरू भक्तपुरका लामिछाने, बाग्लुङका टेकबहादुर घर्ती र दाङका उत्तरकुमार वलीकाे निधन भएपछि यी स्थान रिक्त भएका हुन् ।
त्यसैगरी धरान उपमहानगरपालिकाका प्रमुख तारा सुब्बा, पाँचथरकाे फाल्गुनन्द गाउँपालिकाका अध्यक्ष अमरकुमार नेम्बाङ, संखुवासभाकाे मकालु गाउँपालिकाका अध्यक्ष खड्गबहादुर कटुवाल, महाेत्तरीकाे पिपरा गाउँपालिकाका अध्यक्ष विनाेद चाैधरी र हुम्लाकाे खार्पुनाथ गाउँपालिकाका उपाध्यक्ष सिन्धु हमालकाे निधन भएपछि उपनिर्वाचन हुन लागेकाे हाे । साथै, विभिन्न नगरपालिका र गाउँपालिकाका रिक्त ४३ वडा अध्यक्ष पदका लागि पनि चुनाव हुन लागेकाे निर्वाचन अायाेगले जनाएकाे छ ।
