काठमाडौं । प्युठानको स्वर्गद्वारी नगरपालिका–४ टाकुरामा भारतीय तीर्थयात्री सवार जिप दुर्घटना हुँदा एक बालकको मृत्यु भएको छ।
भिङ्ग्रीबाट स्वर्गद्वारीतर्फ जाँदै गरेको लु १ ज ३१७५ नम्बरको मुस्ताङ जिप अनियन्त्रित भई सडकबाट करिब २५ देखि ३० मिटर तल खसेर दुर्घटना भएको जिल्ला प्रहरी कार्यालय प्युठानले जनाएको छ।
दुर्घटनामा परी एक बालकको घटनास्थलमै मृत्यु भएको हो। मृतकको पहिचान खुल्न बाँकी रहेको प्रहरीले जनाएको छ।
त्यसैगरी दुर्घटनामा २१ जना घाइते भएका छन्, जसमध्ये ५ जना बालबालिका रहेका छन्। घाइतेमध्ये १० जनाको अवस्था गम्भीर रहेकाले थप उपचारका लागि बुटवल रिफर गरिएको छ।
घाइतेहरूलाई प्रहरी र स्थानीयवासीको सहयोगमा उद्धार गरी प्राथमिक स्वास्थ्य केन्द्र भिङ्ग्रीमा प्रारम्भिक उपचारका लागि लगिएको प्रहरीले जनाएको छ।
