काठमाडौं । दक्षिण एशियाली खेलमा सहभागी बन्न नेपाल आएका करिब ३०० खेलाडीमा उत्साह जगाउन पाकिस्तानी मन्त्री डा फेममिदा मिर्जा नेपाल भ्रमणमा आएकी छिन् । सागको उदघाटनका दिन नेपाल आइपुगेकी मन्त्री मिर्जा बुधबारसम्म नेपालमा रहने नेपालस्थित पाकिस्तानी दूतावासले जनाएको छ । पाकिस्तानको अन्तरप्रान्तीय समन्वय मन्त्री डा मिर्जा पाकिस्तानी खेलाडीको उत्साह बढाउन नेपालको तीन दिने भ्रमणमा आएकी हुन् ।
पाकिस्तानले सन् १९८९ मा चौथो र सन् २००४ मा नवौं साग आयोजना गरेको थियो । विभिन्न खेलमा सहभागी हुन महिला र पुरुषतर्फ गरी ३०० पाकिस्तानी खेलाडी नेपाल आएका छन् । पाकिस्तानले अहिलेसम्म एक स्वर्ण, ३ रजत र २ कास्य गरी ६ वटा पदक हात पारेको छ ।
त्यसैगरी भारतले १२, श्रीलंकाले १४ र बंगलादेशले ११ पदक हात पारेका छन् । नेपालले २२ पदकसहित अग्रस्थान हासिल गरिरहेका बेला मालदिभ्स र भुटानका खेलाडीले मंगलबारसम्म पदक हात पार्न सकेका छैनन् ।
