काठमाडौं। दक्षिण तथा मध्य एसिया हेर्ने अमेरिकी सहायक विदेशमन्त्री पल कपुर नेपाल भ्रमणमा आएका छन्। उनको काठमाडौं आगमनसँगै अमेरिका–नेपाल सम्बन्धलाई थप मजबुत बनाउने उद्देश्यसहित उच्चस्तरीय भेटघाट र संवादहरू सुरु भएका छन्।
नेपालस्थित अमेरिकी दूतावासका अनुसार कपुरले आफ्नो भ्रमणका क्रममा नेपाल सरकारका उच्च अधिकारीहरूसँग द्विपक्षीय सहकार्यका विविध विषयमा छलफल गर्ने कार्यक्रम रहेको छ। साथै, उनले निजी क्षेत्रका प्रतिनिधि, व्यवसायिक नेतृत्वकर्ताहरू तथा सांस्कृतिक क्षेत्रका विज्ञहरूसँग पनि भेटघाट गर्ने बताइएको छ।
यस भ्रमणले दुई देशबिचको कूटनीतिक, आर्थिक र सांस्कृतिक सम्बन्धलाई अझ सुदृढ बनाउने अपेक्षा गरिएको दूतावासले जनाएको छ। पछिल्ला वर्षहरूमा अमेरिका र नेपालबिच विकास सहयोग, व्यापार, शिक्षा तथा सांस्कृतिक आदानप्रदानका क्षेत्रमा सहकार्य विस्तार हुँदै आएको छ।
