काठमाडौं । नेपालको इन्स्योरेन्स इस्टिच्यूट (आईआईएन) र भारतको प्रख्यात इन्स्योरेन्स इन्स्टिच्यूट अफ इण्डिया (आईआईआई)बीच सहकार्य गर्ने सम्बन्धी एक सम्झौता पत्रमा हस्ताक्षर भएको छ । सम्झौतासँगै बीमा समिति परिसरमा रहेको इन्स्योरेन्स इन्स्टीच्यूट अफ नेपाल (आईआईएन) ले अन्तर्राष्ट्रिय मान्यता प्राप्त गरेको छ भने यता इन्स्टीच्यूटमार्फत दिइने तालिमले समेत अन्तर्राष्ट्रिय मान्यता प्राप्त गर्ने पक्का भएको छ ।
आईआईएनका प्रमुख कार्यकारी अधिकृत भोजराज शर्माका अनुसार दुई देशका बीमा तालिम सम्बन्धी आधिकारिक निकायबीच सहकार्य गर्ने सम्बन्धी एमओयुमा हस्ताक्षर भएको हो । एमओयुमा बीमा समितिका कार्यकारी निर्देशक तथा आईआईएनका अध्यक्ष राजुरमण पौडेल तथा भारतीय कम्पनी आईआईआईका अध्यक्षले हस्ताक्षर गरेका छन् । आईआईएनले बताए अनुसार मंसिर ११ गते नयाँदिल्लीस्थित आईआईआईको मुख्यालयमा दुई निकायका बीचमा हस्ताक्षर सम्पन्न भएको हो ।
सम्झौतापत्रमा प्रोफेशनल कोर्स विकास गर्ने, आईआईएनको सिर्टिफिकेटलाई मान्यता दिने र नेपालमा अध्ययनका लागि केन्द्र स्थापना गर्ने लगायतका सम्झौता गरेको सिईओ शर्माले बताए । चार सदस्यीय टोली भारतीय बीमा इन्स्टीच्यूटसँग छलफल गर्न त्यसतर्फ गत साता मात्र गएको थियो । टोलीमा इन्स्टीच्यूटका अध्यक्ष पौडेल, सिईओ शर्मा तथा अन्य दुई जना सञ्चालकहरु रहेका थिए । सहमतिपछि नेपालमा बीमा तालिम तथा दक्ष जनशक्तिको लागि ढोका खुलेको बताए ।
