काठमाडौं । पाकिस्तानकी अन्तर प्रान्तीय समन्वय मन्त्री डा. फेमिदा मिर्जा र नेपालका युवा तथा खेलकुद मन्त्री जगत बहादुर सुनारबीच भेटवार्ता भएको छ।
काठमाण्डौमा आयोजित तेह्रौं दक्षिण एसियाली खेलकुदको उद्घाटन समारोहमा सहभागी हुन तीनदिने नेपाल भ्रमणमा आउनुभएका मन्त्री मिर्जाले सार्क राष्ट्रहरूको सहभागिता रहने साग खेलकुदको भव्य आयोजना गरेकोमा नेपाललाई बधाई दिनुभएको छ । साथै उहाँले युवा खेलकुदले पारस्परिक समझदारीको वातावरण तयार गर्नुका साथै सार्कको मनोभावना बमोजिम लोकतन्त्रको जग अझ दरिलो बनाएको बताउनुभयो। भेटमा मन्त्री मिर्जाले रोकिएको सार्क प्रकृयाले गति लिने विश्वास व्यक्त गर्नुभयो।
दुई मन्त्रीहरूबीच द्विपक्षीय सहयोग आदानप्रदानको प्रकृया र माध्यमको बारेमा छलफल भयो। सो सम्बन्धमा पाकिस्तानी मन्त्री डा. मिर्जाले नेपालले मनाउन लागेको ‘नेपाल भ्रमण वर्ष २०२०’ संयोगवश पाकिस्तान(नेपालबीचको कुटनीतिक सम्बन्धको ६०औं वर्षसँग मेल खाएको बताउनुभयो। यसले दुई देशबीच सबै क्षेत्रमा, खासगरी खेलकुद तथा युवा गतिविधिमा, तात्विक सहयोगको मात्रा बढाउने अवसर प्रदान गर्ने बताउनुभयो। उहाँले मन्त्री सुनारलाई आगामी वर्ष पाकिस्तानको भ्रमण गर्न निम्तो समेत दिनुभयो।
त्यस्तै, पाकिस्तान र नेपालबीच रहिआएको सुमधुर सम्बन्धलाई इंगित गर्दै मन्त्री सुनारले सबै अवसरलाई भरमग्दुर उपयोग गरी खेलकुद र युवा अन्तरक्रियाको माध्यमबाट दुई देशबीचको जनस्तरको सम्बन्धलाई प्रगाढ बनाउने आफ्नो उत्कट ईच्छा व्यक्त गर्नुभयो। मन्त्री मिर्जाले जम्मु(कश्मीर विवाद र क्षेत्रीय अवस्थाको बारेमा धारणा प्रस्तुत गर्दै जारी तनावको अन्त्य हुनुपर्नेमा जोड दिनुभएको थियो। उहाँले क्षेत्रीय शान्ति र स्थिरता विकास र समृद्धिका पूर्वशर्त भएको बताउनुभयो।
