काठमाडौँ। आसिफ शेखको कीर्तिमानी दोहोरो शतकमा एपिएफ क्लवले मधेस प्रदेशलाई हराएसँगै प्रधानमन्त्री कप एकदिवसीय क्रिकेट प्रतियोगितामा सुदूरपश्चिम फाइनलमा पुगेको छ ।
त्रिभूवन आर्मी क्लव यसअघि नै फाइनलमा पुगिसकेको थियो । यो खेलअघि मधेश र सुदूरपश्चिम प्रदेशको मात्र शीर्ष दुई स्थानमा रहेर फाइनल खेल्ने सम्भावना देखिन्थ्यो । तर मधेसले आफ्नो आठौं खेलमा सोवबार एपिएफसँग ७४ रनको हार व्यहो¥यौं । यससँगै मधेस एक खेलअगावै फाइनल पुग्ने सम्भावनाबाट बाहिरिएको हो ।
कप्तान विनोद भण्डारीको शतकमा आर्मीले कोशी प्रदेशलाई १८५ रनले हरायो । यो जितसँगै आर्मी शिर्ष स्थानमा रहेर सुदूरपश्चिमसँग फाइनलमा खेल्ने समीकरण पूरा भएको हो । अपराजित आर्मी र सुदूरपश्चिमले आगामी शुक्रवार उपाधिका लागि खेल्नेछ । प्रधानमन्त्री कप खेल्ने सुदूरपश्चिम विभाग बाहिरको पहिलो टोली हो ।
वीरगञ्जमा एपिएफ र मधेस तथा जनकपुरमा आर्मी र कोशीबीचको खेलमा रनको वर्षा नै भयो । आर्मी र एपिएफ दुवैले ३६० रनभन्दा माथिको लक्ष्य दियो । वीरगञ्जमा ओपनर आसिफले दोहोरो शतक पूरा गर्दै कीर्तिमान बनाए । नारायणी क्रिकेट मैदानमा एपिएफले ३९१ रनको चुनौतीपूर्ण लक्ष्य बनायो ।
जवाफी ब्याटिङ गरेको मधेसले पूरै ओभरमा आठ विकेट गुमाएर ३१६ रन मात्र बनाउन सक्यो । तेस्रो ओभरमै ओपनर मायन यादव आउट भएपछि मधेशको सुरुआत राम्रो हुन सकेन । अर्का ओपनर मोहम्मद समीर २३ रन र कप्तान अनिल साह २९ रनमा आउट भएपछि मधेस दबाबमा पर्यो।
मध्य क्रमका ब्याटर मोहम्मद आदिल आलम र अरनिको यादवको अर्धशतक बनाउँदै इनिङ समाले । आलमले ८७ रन जोड्दा ४३ बलमा ६ चौका र ८ छक्का प्रहार गरे । अरनिकोले ८७ रन बनाए ।
उनको इनिङमा आठ चौका र ६ छक्का रह्यो । रूपेश सिंह ६ र विशाल सुस्लिङ ३९ रनमा आउट भए । एपिएफको बलिङमा अभिषेक गौतमले तीन, कमलसिंह ऐरीले दुई तथा भुवन कार्की, युवराज खत्री र कप्तान रोहित पौडेलले समान एक विकेट लिए ।
टस हारेर पहिले ब्याटिङ गरेको एपिएफले पूरै ओभरमा चार विकेट गुमाएर तीन सय ९० रनको विशाल योगफल बनाएको थियो । यो यस प्रतियोगिताकै सर्वाधिक ठूलो योगफल हो । ओपनर आसिफ २०८ रनमा अविजित रहे । उनले १४२ बलको सामना गरेर १५ चौका र १७ छक्का प्रहार गरे ।
आसिफले दोहोरो शतक पूरा गर्न १३७ बल खेले । दोहोरो शतक बनाएपछि उनी रिटायर्ट आउट भए । कप्तान रोहित पौडेलले प्रतियोगिताको अन्तिम खेलमा पहिलो अर्धशतक प्रहार गरे ।
उनले ७३ बलमा ५५ रन जोडे । सन्दीप जोरा ४२ बलमा ५६ रन जोडेपछि एपिएफ झन्ड चार सय रनको योगफल नजिक पुगेको हो । दीपक बोहोरा १३ रनमा आउट हुँदा लोकेश बम २१ रनमा अविजित रहे ।
मधेसको बलिङमा रूपेशले तीन तथा रञ्जित कुमारले एक विकेट लिए । लिगको नवौं खेलबाट एपिएफले ११ अंकका साथ तेस्रो स्थानमा रहेर प्रतियोगिता समाप्त गरेको छ । मधेशको भने आठ खेलबाट ९ अंक छ । मधेस अन्तिम खेलमा नेपाल पुलिस क्लवसँग खेल्दै छ ।
विनोदको कीर्तिमानी शतक, आर्मी शिर्षमा
कप्तान विनोद भण्डारीको कीर्तिमानी शतकमा आर्मीले प्रधानमन्त्री कपमा सातौं जित निकाल्दै अपराजित यात्रा कायम राखेको छ ।
दुई खेलअघि नै फाइनलमा पुगेको आर्मी कोशीमाथि रबाफिलो जितसँगै लिगको शिर्ष स्थानमा रहँदै उपाधिका लागि प्रतिस्पर्धा गर्ने भएको छ । आर्मीको फराकिलो जितमा कप्तान विनोदले १८९ रनको उत्कृष्ट इनिङ खेले ।
उनले लगातार दोस्रो शतक प्रहार गरे । यसअघि आफ्नो गृह टोली सुदूरपश्चिम प्रदेशविरुद्ध पनि विनोदले शतक बनाएका थिए । प्रधानमन्त्री कपमा उनको सर्वाधिक पाँचौ शतक हो । एपिएफका आसिफले चार शतक र अर्जुन कुमाल तीन शतक बनाएका छन् । यस संस्करणमा अर्जुन, आसिफ र विनोद सर्वाधिक रनकर्ताको सूचीमा शीर्ष तीन स्थानमा छन् । अर्जुनले ४९८ रन, आसिफले ४५७ र विनोदले ४०२ रन बटुलेका छन् ।
रामजानकी क्रिकेट मैदानमा आर्मीले ३६३ रनको चुनौतीपूर्ण लक्ष्य दियो । तर, त्यो लक्ष्य पछ्याएको कोशी ३६ ओभरमा १७७ रनमा नै अलआउट भयो । यससँगै आठौं खेलसम्म आर्मी अपराजित रहँदा कोसी नवौं खेलमा पनि जितविहीन हुँदै यस संस्करणबाट बाहिरियो ।
कोसीका प्रभात राईले ३८ रन बनाए । यो नै सर्वाधिक ठूलो व्यक्तिगत रन रह्यो । शिवान्स बजगाईं ३७, कप्तान सुजन थपलिया ३० र आशिष मगर २५ रनमा आउट भए ।
आर्मीको बलिङमा आकाश चन्दले तीन, बसिर अहमदले दुई तथा शाहब आलम, पवन कार्की र नरेन साउदले समान एक विकेट लिए । पहिले ब्याटिङ गरेको आर्मीले पूरै ओभरमा ८ विकेट गुमाएर ३६२ रनको विशाल योगफल बनाएको थियो ।
कप्तान विनोदले १८९ रनको शतकीय इनिङ खेले । उनले १५० बलको सामना गर्दै २१ चौका र पाँच छक्का प्रहार गरे । विनोदले शतक पूरा गर्न ९१ बल लगाए । भीम सार्कीले ६५ बलमा ८० रन जोड्दै विनोदलाई साथ दिए ।
ओपनर तृतराज दास ३३ र अर्जुन साउद ३१ रनमा आउट भए । कोशीको बलिङमा विपिन महतोले तीन तथा दीपेश कँडेल, रोसन शाह र आशिष मगरले समान एक विकेट लिए । –न्युज एजेन्सी नेपाल
