ललितपुर। नेपाल सरकारका नवनियुक्त राजपत्राङ्कित तृतीय श्रेणीका शाखा अधिकृत वा सो सरहका दुई सय तीन अधिकृतको दीक्षान्त समारोह सम्पन्न भएको छ ।
नेपाल प्रशासनिक प्रशिक्षण प्रतिष्ठान (स्टाफ कलेज) जावलाखेल, ललितपुरले सञ्चालन गरेको ४०औँ आधारभूत प्रशासन प्रशिक्षण आज सम्पन्न भएसँगै उहाँहरूलाई दीक्षान्त गरिएको हो ।
कार्यक्रममा स्टाफ कलेजका कार्यकारी निर्देशक रामशरण पुडासैनीले नयाँ मानक स्थापना गर्दै देशका लागि सम्झनलायक काम गर्न आग्रह गर्नुभयो ।
“प्रतिबद्धतालाई व्यवहारमा लागू गर्नुहोला, राष्ट्रसेवकको हैसियतले धेरै कुराको सुधार र मानक स्थापित गर्ने सन्दर्भमा स्टाफ कलेजले आफ्नो नियमिततालाई परिस्कृत गर्दै अगाडि बढिरहेको छ । यहाँको सिकाइलाई व्यवहारमा उतार्दै नयाँ उचाईँ हासिल गर्न नीतिगत पुनःसंरचनाका विषयमा हामीसँगसँगै छौँ”, उहाँले भन्नुभयो ।
स्टाफ कलेजले हरेक वर्ष चार हजार कर्मचारीलाई प्रशिक्षण दिने गरेको जानकारी गराउँदै कार्यकारी निर्देशक पुडासैनीले सेवा प्रवाहलाई थप प्रभावकारी र मितव्ययी बनाउन ध्यान दिइएको बताउनुभयो ।
कार्यक्रममा सङ्घीय संसद् सचिवालयका सचिव सुरजकुमार दूराले नवप्रवेशी अधिकृतहरूलाई अध्ययन र अनुसन्धानलाई निरन्तरता दिँदै देशहितका पक्षमा काम गर्न आग्रह गर्नुभयो ।
सार्वजनिक वित्त व्यवस्थापन तालिम केन्द्रका प्रमुख महेश बरालले समयको परिपालना गर्दै सार्वजनिक सेवाको मूल्यलाई उच्च राख्न आग्रह गर्नुभयो । उहाँले आफूले गरेको कामप्रति सधैँ जवाफदेही हुनेगरी लाग्नुका साथै ज्ञान, सीप र क्षमतालाई सही ढङ्गले उपयोग गर्नु सुझाव दिनुभयो ।
सङ्घीय मामिला तथा सामान्य प्रशासन मन्त्रालय, मानव संशाधन तथा योजना महाशाखाका उपसचिव लेखनाथ न्यौपानेले निजामती सेवाको छविलाई उच्च राख्दै राष्ट्रको सेवासँगै आफ्नो क्षमता विकासमा ध्यान दिन आग्रह गर्नुभयो ।
स्टाफ कलेजका सार्वजनिक सेवा तालिम विभाग प्रमुख त्रिलोचन पोखरेलले निजामती सेवाको मूल्य–मान्यताअनुरुप सेवा प्रवाह गर्ने क्षमतालाई गुणस्तरीय, प्रश्नविहीन र उच्च मूल्याङ्कन योग्य बनाउन आग्रह गर्नुभयो ।
दीक्षान्त भएकाहरूका तर्फबाट अधिकृत पवित्रा रानाले चारमहिने तालिमले जनसेवाप्रति जिम्मेवार, जवाफदेही र उत्तरदायी बनाएको बताउनुभयो । प्रशिक्षण गत पुस २ गतेबाट सञ्चालन भएको थियो । रासस
