काठमाडौंः नेपालकाे वातावरणका क्षेत्रमा लामाे समयदेखि सकृय संस्था नेपाल वातावरण पत्रकार समूहले निर्माण गर्न लागेको नयाँ कार्यालय भवनको शुक्रबार शिलान्यास गरिएकाे छ । समूहको मुख्य कार्यालय रहेकाे ललितपुर भनिमण्डलमा आयोजित एक विशेष समाराेहमा अर्थमन्त्री डा युवराज खतिवडाले भवनको शिलान्यास गरेका हुन् । करिब १ कराेड ५० लाखकाे लागतमा आगामी १० महिनाभित्र निर्माण सम्पन्न गरिसक्ने लक्ष्य सहित नयाँ भवनको शिलान्यास गरिएको समूहका महासचिव निमेष रेग्मीले जानकारी दिए ।
भवनको शिलान्यास गर्दै अर्थमन्त्री खतिवडाले भौतिक निर्माण मात्र नभई वातावरण संरक्षण र नीति निर्माणको क्षेत्रमा नेवापससँग सहकार्य गर्न सरकार तयार रहेको बताए । अर्थमन्त्री खतिवडाले मानिस र वातावरणबीचको द्वन्द्वलाई युद्ध होइन सहकार्यको रुपमा बुझिनुपर्ने पनि बताए । उनले गरिबी निवारण र वातावरण संरक्षण एकअर्कासँग जोडिएको भन्दै वन विनास, दुर्लभ वन्यजन्तुको तस्करी र खनिजको दोहन गरिबीसँग जोडिएको छ, त्यसैले राज्यले त्यसको व्यवस्थापन गर्नुपर्नेमा जाेड दिए ।
कार्यक्रममा वरिष्ठ पत्रकार भैरव रिसालले कार्य समितिलाई शुभकामना दिँदै समूहले वातावरणको क्षेत्रमा उत्कृष्ट कार्य गरेर छुट्टै पहिचान बनाउन सफल भएको बताए । समूहका अध्यक्ष कसमस विश्वकर्माले समूहको स्थायित्वका लागि भवन अपरिहार्य रहेको र त्यसको शिलान्यास हुनु ऐतिहासिक कार्य भएको बताए । सरकारसँग नजिकमा रहेर वातावरण र विकासका मुद्दाहरू उठाउने र जनचेतना जगाउने काममा वर्षौदेखि लागिरहेको उनको भनाई थियो।
समूहसँग अहिले उपलब्ध स्रोतले भवन निर्माण गर्न नसकिने र सबैको सहभागिता र सहयोग आवश्यक रहेकोमा उनको जोड थियो। उनले सबैलाई आफ्नो क्षेत्रबाट भवन निर्माणका लागि सहयोग गर्न आव्हान पनि गरेका छन् । भवन निर्माणका लागि समूहले ओम बुद्ध इन्जिनियरिङ प्राइभेट लिमिटेड र पिसी विल्डर्स एण्ड सप्लायर्स प्राइभेट लिमिटेडको संयुक्त उपक्रम (जेभी) सँग सम्झौता गरेको छ ।
अडियाे भिजुअल स्टुडियाे, अत्याधुनिक पुस्तकालय, सभाहल, हाकाहाकी अनलाइन समेतका लागि उपयुक्त कार्यस्थल निर्माण गर्नेगरी उक्त भवन निर्माण हुन लागेकाे हाे । याे जमिन समूहकाे स्वामित्वमा रहे पनि रकम अभावमा विगतमा भवन निर्माण हुन सकेकाे थिएन । तर २०७२ काे भूकम्पपछि समूहकाे पहलमा अग्रज पत्रकार सहजमान श्रेष्ठकाे अध्यक्षतामा रहेकाे तत्कालीन कार्य समितिले रेडियाे सगरमाथाका लागि भूकम्प प्रतिराेधी भवन निर्माण गरेकाे थियाे ।
समूहले हाल रेडियाे सगरमाथा १०२.४ मेगाहर्जमा सामुदायिक रेडियाे संचालन गर्नुका साथै वातावरण, जलवायु परिवर्तन, वन, जलाधार क्षेत्र समेतका विविध जल्दाबल्दा वातावरणीय विषयमा अडियाे, भिजुअल (आँखीझ्याल) लगायतका प्रचारात्मक, चेतनामूलक र दबाबमूलक कार्यहरू गरिरहेकाे छ । वातावरण र विकासका क्षेत्रमा लामाे समयदेखि कृयाशील समूहमा झण्डै १५० जना पत्रकार, विज्ञहरू सदस्य छन् ।
