वीरगंज । पर्साको ग्रामिण क्षेत्रका सामुदायिक विद्यालयमा अध्ययनरत गरीब, दलित छात्रछात्राहरू धान कटानीमा व्यस्त रहेका कारण विद्यालय जान छाडेका छन् । प्रत्येक वर्ष दश वर्षदेखि माथिका गरीब, दलित विद्यार्थीहरू धान–गहुँ काट्ने सिजनमा विद्यालयमा अनुपस्थित हुने गरेको पाइएको छ । यसपटक पनि धान कटानीको बेला विद्यालयमा गरीब, दलित बालबालिकाहरूको संख्या घटेको छ ।
धान कटानी हुने ठाउँमा छुटेका धानका बाला बटुल्ने, खेतको धान कटानीमा संलग्न हुने जस्ता कार्यमा विद्यार्थीहरूलाई देख्न सकिन्छ । आर्थिक अवस्था कमजोर भएको कारण उनीहरूले धान र गहुँ कटानीको बेला विद्यालय नजाने र त्यसमा संलग्न हुने गरेका हुन् । पर्सागढी नगरपालिकाका शिक्षा शाखा संयोजक एवं नेरामावि बर्वाछटौलीका प्रअ रामबहादुर चौधरीले धान, गहुँ काट्ने बेलामा गरीब, दलित बालबालिकाहरूको अनुपस्थिति हुने गरेको बताए ।
उनले प्रत्येक वर्ष यो प्रक्रिया दोहोरिंदै आएको र यसपटक पनि बालबालिकाहरू धान काट्न, धानको बाला बटुल्न खटेकाले विद्यालय नआएका जानकारी गराएका हुन् । दलित, गरीबका बालबालिकाहरू विद्यालयमा छात्रवृत्ति वितरण र पोशाक वितरणमा अनिवार्यरूपमा उपस्थित हुने गरेका र नपाएपछि विरोध गर्दै आएको समेत उनले सुनाए ।
उनीहरुलाई विद्यालय भर्ना गराउन वर्षमा एकपटक विद्यालय भर्ना अभियान सञ्चालन गर्नुका साथै विद्यालय नआउने बालबालिकाका अभिभावक र विद्यार्थीलाई सम्झाउँदै आएको भएपनि प्रतिफल सन्तोषजनक नभएको प्रअ चौधरीले बताए । छात्रवृत्ति, पोशाक वितरणका लागि विद्यालयमा ६० प्रतिशत विद्यार्थीहरूको उपस्थिति अनिवार्य छ । तर गरीब, दलितको संख्या बढी भएको तर उनीहरू नै विद्यालय नआउँदा समस्या आउने गरेको उनले बताए । सौर्य दैनिकबाट
