काठमाडौं। प्रधानमन्त्री तथा मन्त्रीहरूको सम्पत्ति विवरण सार्वजनिक भएको छ ।
सार्वजनिक भएको सम्पत्ति विवरण अनुसार कानुन, न्याय तथा संसदीय मामिला मन्त्री सोविता गौतमले बैंक ब्यालेन्स स्वरुप १० लाख ५० हजार ३३५ रुपैयाँ मौज्दात रहेको उल्लेख गरेकी छिन् ।
विवाहमा १० तोला र पैत्रिक ५ तोला सुन देखाएकी छन् । पैत्रिक ९ तोला चाँदी देखाएकी छन् । विवाहमा एक तोला हिरा प्राप्त भएको उनको विवरणमा उल्लेख छ ।
बैंकतर्फ एनआइसी एसियामा तीन लाख ६८ हजार ८६७ रुपैयाँ, राष्ट्रिय वाणिज्य बैंकमा ४६ हजार ८७४ रुपैयाँ, नबिल बैंकमा ४ लाख ८१ हजार, ७६७ रुपैयाँ, माछापुच्छ्रे बैंकमा १ लाख ४४ हजार ५५३ रुपैयाँ देखाइएको छ । ग्लोबल बैंकमा ८ हजार २७४ रुपैयाँ रहेको देखाइएको छ ।
व्यवसायबाट, लगानी र तलब भनेर नगद विवरण देखाइएको छ । ग्लोब ट्रट हिमालय टूर्स एण्ड ट्रेक्समा ५० प्रतिशत सेयर, सोपा मल्टिपल कम्पनीमा प्रतिकित्ता एक सय दरको ६ हजार ५ सय कित्ता प्रमोटर सेयर भएको उल्लेख गरिएको छ ।
श्रीमान गृहेन्द्र घिमिरेले एभरेष्ट बैंकबाट ९५ लाख ऋण लिएर बा ३ च ६७२२ नम्बरको गाडी खरिद गरेको उल्लेख छ । उक्त गाडी ऋण, तलब र पुरानो गाडी एक्सचेन्ज गरेर खरिद गरिएको विवरणमा उल्लेख छ ।
