भारत र वेस्ट इन्डिजबीच आइतबार साँझ भारतको थिरुवन्तपुरममा सम्पन्न दोस्रो टी२० क्रिकेट प्रतियोगितामा वेस्ट इन्डिज ८ विकेटले विजयी भएको छ । भारतले प्रस्तुत गरेको १७१ रनको लक्ष वेस्ट इन्डिजले १८.३ ओभरमै पूरा गरेको थियो । वेस्ट इन्डिजको जितमा प्रारम्भिक ब्याट्सम्यान लेन्डल सिमन्सले अविजित ६७ रन महत्वपूर्ण रह्यो । वेस्ट इन्डिजका लागि एभिन लेविसले ४०, सिमरन हिटमाएरले २३ तथा निकोलास पूरानले अविजित ३८ रन बनाएका थिए ।
यो जितसँगै तीन खेलको शृंखला १ – १ को बराबरीमा आइपुगेको छ । अब दुबै टिमबीच डिसेम्बर ११ मा तेस्रो तथा अन्तिम टी२० खेल हुनेछ ।
टस हारेर पहिले ब्याटिङको निम्ता पाएको भारतले ७ विकेटको क्षतिमा १७० रन बनाएको थियो । भारतका लागि शिवम दुबेले सर्वाधिक ५४ रन बनाएका थिए । भारतका लागि रोहित शर्माले १५, केएल राहुलले ११, विराट कोहलीले १९, रिसभ पन्तले ३३ (नटआउट), श्रेयस ऐयरले १०, रविन्द्र जडेजाले ९ र वासिंगटन सुन्दर ० रनमा आउट भएका थिए ।
