मकवानपुर। बागमती प्रदेशसभाको १७औँ हिउँदे अधिवेशन आजदेखि प्रारम्भ भयो ।
अधिवेशनअन्तर्गत आज बसेको बैठकमा उपसभामुख अप्सरा चापागाईंले बागमती प्रदेश प्रमुख दीपकप्रसाद देवकोटाबाट प्रदेशसभाको अधिवेशन आह्वानसम्बन्धी पत्र वाचन गर्नुभएको थियो । उहाँले तत्कालीन सभामुख भुवनकुमार पाठकले आफ्नो पदबाट दिनुभएको राजीनामा तथा छ जना प्रदेशसभा सदस्यले दिनुभएको राजीनाबारे सभालाई जानकारी गराउनुभयो ।
उपसभामुख चापागाईंले सभामुख एवम् उपसभामुख बैठकमा अनुपस्थित रहेको अवस्थामा सभा सञ्चालनका लागि मनोनीत गर्नुभएका चार सदस्यको नाम बैठकले स्वीकृत गरेको छ । मनोनीत हुनेहरू सुना परियार, सुष्मा भुजेल न्यौपाने, हरिप्रसाद सापकोटा र लक्ष्मी घिमिरे रहनुभएको छ ।
बैठकको विशेष समयमा सम्बोधन गर्दै मुख्यमन्त्री इन्द्रबहादुर बानियाँले सङ्घीय सरकारसँगको सहकार्य र समन्वयमा प्रदेश सरकारले सुशासन प्रवर्द्धनका लागि काम गर्ने बताउनुभयो । उहाँले प्रदेशका विभिन्न जिल्लामा बहुवर्षीय योजनालाई क्रमशः कार्यान्वयन गर्दै लैजाने सरकारको नीति रहेको उल्लेख गर्नुभयो ।
प्रदेशसभाको अर्को बैठक बुधबार बिहान ११ः०० बजे बस्नेछ । रासस
