काठमाडौं: अन्तर्राष्ट्रिय फुटबल महासंघ (फिफा) र एसियाली फुटबल महासंघ (एएफसी)ले एउटा पत्र पठाई अखिल नेपाल फुटबल संघ (एन्फा)को निर्वाचन सात दिनभित्र हुने सुनिश्चित नभए निलम्बन प्रक्रिया अघि बढ्ने चेतावनी दिएका छन् ।
एन्फा महासचिव किरण राईलाई संयुक्त पत्र लेख्दै ७ दिनभित्र निर्वाचन प्रक्रिया पुन: सुरु गर्न र अन्तिम रूप दिन निर्देशन दिएका छन् ।
पत्रमा लेखिएको छ, यदि राखेपले उक्त निर्णय रद्द वा खारेज नगरेमा र यो पत्र प्राप्त भएको सात दिनभित्र एन्फालाई उक्त निर्णयको कुनै प्रभाव नरहेको र एन्फाले राखेपद्वारा लगाइएको निलम्बन पूर्वको अवस्थाबाट आफ्नो चुनावी प्रक्रिया पुन: सुरु गरी सम्पन्न गर्न सक्ने कुरा लिखित रूपमा सुनिश्चित नगरेमा, यो विषय एन्फालाई तत्काल निलम्बनका लागि फिफा काउन्सिलमा पेश गरिनेछ ।
पत्रमा हामी २७ मार्च २०२६ मा सम्पन्न हुने तर स्थगित भएको एन्फा चुनावी साधारण सभामा सहभागी हुन आएका फिफा र एएफसी प्रतिनिधिहरूको हालैको संयुक्त भ्रमणलाई स्मरण गराउन चाहन्छौ भनिएको छ ।
राखेपले कार्यकारी समितिको निर्णय अनुसार एन्फालाई तीन महिनाको लागि निलम्बन गरेको छ । पत्रमा अगाडि भनिएको छ, हामीलाई यो पनि जानकारी भएको छ कि राखेपले एन्फालाई जारी चुनावी प्रक्रिया रोक्न, एन्फा विधानका केही प्रावधानहरू संशोधन गर्न, र जिल्ला संघहरूलाई उनीहरूको विधान संशोधन गरी चुनावी साधारण सभाहरू गर्न निर्देशन दिएको छ।
राखेपको निर्णयले निर्धारित चुनावी साधारण सभाको एक दिन अगाडि नै एन्फाको चुनावी प्रक्रियालाई अप्रत्याशित रूपमा रोकेको देखिन्छ। यसबाहेक, यसले एन्फालाई आफ्नो विधान संशोधन गर्न बाध्य तुल्याएको छ। यस्तो निर्णयले स्पष्ट रूपमा एन्फालाई आफ्नो मामिलाहरू स्वतन्त्र रूपमा व्यवस्थापन गर्नबाट रोक्छ र यो तेस्रो पक्षको अनुचित हस्तक्षेपको स्पष्ट उदाहरण हो, पत्रमा भनिएको छ ।
हामी स्मरण गराउन चाहन्छौं कि सदस्य संघको निलम्बनले फिफा विधानमा परिभाषित गरिए अनुसार अन्तर्राष्ट्रिय प्रतियोगिताहरूमा सहभागिता र फिफा तथा एएफसीका विकास कोषहरूमा पहुँच लगायतका सम्पूर्ण सदस्यता अधिकारहरू गुम्नेछ, पत्रमा चेतावनी दिइएको छ ।
साथै, निलम्बन कायम रहुन्जेल अन्य सदस्य संघहरूलाई एन्फासँग खेलकुद सम्बन्ध राख्न प्रतिबन्ध लगाइने पनि भनिएको छ ।
