काठमाडाैँ । बागमती प्रदेशका कृषि तथा पशुपन्छी विकास मन्त्री मधुसुदन पौडेलले व्यवसायी प्रवर्द्धनका लागि नीतिगत सुधार गर्न सरकार तयार रहेको बताएका छन्।
नर्सरी व्यवसायी महासंघले राजधानीमा आयोजना गरेको एक प्रदर्शनीलाई सम्बोधन गर्दै मन्त्री पौडेलले नर्सरी तथा पुष्प व्यवसायको विकासका क्रममा देखिएका समस्या समाधान गर्न सरकार प्रतिबद्ध रहेको उल्लेख गरे। उनका अनुसार व्यवसायीहरूले भोगिरहेको मुख्य चुनौती आन्तरिक प्रतिस्पर्धाभन्दा पनि विदेशी आयातित वस्तुसँगको प्रतिस्पर्धा रहेको छ।
मन्त्री पौडेलले बागमती प्रदेश सरकारले प्लास्टिकका फूलहरूको प्रयोगलाई निषेध गर्ने नीति लिएको जानकारी दिँदै उक्त निर्णय कार्यान्वयनमा ल्याउन सरकार सक्रिय रहेको बताए। उनले नीति प्रभावकारी बनाउन स्थानीय तहको अनुगमन अत्यावश्यक रहेकोमा पनि जोड दिए।
उनले भने, “हाम्रो मुख्य ध्यान व्यवसायी प्रवर्द्धनका लागि आवश्यक नीतिगत सुधारमा केन्द्रित छ। व्यवसायीहरूले आन्तरिक प्रतिस्पर्धाभन्दा पनि विदेशी सामानसँग प्रतिस्पर्धा गर्नुपर्ने अवस्था छ। त्यसैले स्वदेशी उत्पादनलाई प्रोत्साहन गर्ने नीति आवश्यक छ।”
उनका अनुसार प्रदेश सरकारले प्लास्टिकका फूलहरूको प्रयोग घटाउँदै स्वदेशी उत्पादनलाई प्राथमिकता दिने नीति अघि सारेको छ। साथै, सरकारी निकायहरूमा प्लास्टिकका फूलहरूको प्रयोग निषेध गर्ने निर्णय समेत कार्यान्वयनमा ल्याइएको उनले जानकारी दिए।
मन्त्री पौडेलले बजार अनुगमनको प्रभावकारी कार्यान्वयन स्थानीय तहबाट हुनुपर्ने बताउँदै स्वदेशी उत्पादनलाई प्रोत्साहन गर्न केन्द्रदेखि स्थानीय तहसम्म समन्वय आवश्यक रहेको उल्लेख गरे।
त्यस्तै, उनले नेपाली किसान र व्यवसायीलाई विदेशी आयातित वस्तुको प्रतिस्पर्धाबाट जोगाउन नीतिगत सहयोग आवश्यक रहेको बताए। उनले गोदावरी, सयपत्री र मखमली जस्ता स्वदेशी फूलहरूको प्रयोग पर्व तथा अन्य अवसरहरूमा बढाउनुपर्नेमा पनि जोड दिए।
