काठमाडौँ। नेपाली काँग्रेसका सुदूरपश्चिम प्रदेश सभापति वीरबहादुर बलायरले पार्टीभित्रको आन्तरिक कलह र गुटबन्दीले समग्र पार्टी नै कमजोर बनेको भन्दै नेतृत्वलाई दम्भ त्यागेर एकताको बाटो रोज्न आग्रह गर्नुभएको छ ।
पार्टीभित्र पछिल्लो समय देखिएका असन्तुष्टि र समूहगत गतिविधिहरूलाई लिएर संस्थापन पक्षले ‘कारबाहीको डन्डा’ चलाउने तयारी गरिरहेको चर्चाका बीच बलायरले यस्तो प्रतिक्रिया दिनुभएको हो ।
उहाँले पार्टीभित्र भइरहेका गतिविधिहरूलाई ‘समानान्तर’ भन्न नमिल्ने तर्क गर्दै यसलाई काँग्रेसप्रतिको चिन्ता र चासोका रूपमा लिनुपर्ने बताउनु भयो । उहाँले दुवै पक्षले दम्भ त्यागेर बीचको बाटो अपनाउनुको विकल्प नरहेको स्पष्ट पार्नुभयो । पार्टीको वर्तमान अवस्थाप्रति टिप्पणी गर्दै बलायरले अहिले काँग्रेसमा कोही पनि चोखो नरहेको बताउनु भयो । संस्थापन पक्षले कारबाहीको तयारी गरेको विषयमा टिप्पणी गर्दै बलायरले भन्नुभयो, ‘हिजो व्यक्तिपिच्छे यस्ता गतिविधि हुन्थे, अहिले समूहगत रूपमा भएका छन् । यो कुनै नौलो कुरा होइन । यसलाई अति रूपमा
लिएर कारबाहीको डन्डा चलाउनुभन्दा एकताका उपायहरू खोजिनुपर्छ । अहिले काँग्रेसमा ‘ए टु जेड’ सबै खुइलिएका छन् । कोही कम होलान्, कोही बढी, तर कसैले कसैलाई खुइल्याएर कोही बलियो हुने परिस्थिति छैन । पार्टीले धेरै ठूलो धोका र अप्ठ्यारो बेहोर्नु परेको छ, यसलाई सबैले स्वीकार गरेर नयाँ उपायका साथ अगाडि बढ्नुपर्छ ।’
आम कार्यकर्तामा पार्टी विभाजित हुने हो कि भन्ने त्रास रहेको सन्दर्भमा बलायरले अर्को पार्टी गठन गर्नका लागि भएको भेला नभएको बताउनु भयो ।
उहाँले अहिलेको अवस्थामा अतिवाद र चरम उत्कर्षमा पुगेर एकले अर्काको ‘वध’ गरेर कसैलाई पनि उपलब्धि नहुने चेतावनी दिनुभयो । आगामी दिनमा काँग्रेसलाई कसरी पुनर्ताजगी दिने भन्नेमा दुवै पक्ष जिम्मेवार र चिन्तित हुनुपर्नेमा उहाँले जोड दिनुभयो । –न्युज एजेन्सी नेपाल
