बाँके। नेपालगञ्ज उपमहानगरपालिका–१२ कोरियनपुरमा जलेको अवस्थामा भेटिएकी २२ वर्षीया सिर्जना बुढामगर (गीता)का आफन्तले निष्पक्ष छानबिनको माग गर्दै प्रदर्शन गरेका छन् ।
आइतबार बिहान जलेको अवस्थामा सडकमा भेटिएकी २२ वर्षीया बुढामगरलाई प्रहरीले उद्धार गरेर अस्पताल लगेकामा चिकित्सकले मृत घोषित गरेका थिए । मृतकका आफन्तले आज नेपालगञ्जमा विरोध प्रदर्शन गर्दै जिल्ला प्रहरी कार्यालय गेटमा पुगेर धर्ना दिएका थिए ।
बुढामगरको शरीरमा आगो लगाएर जलाइएको भन्दै यस कार्यमा संलग्नलाई कडा कानुनी कारबाही गर्नुपर्ने आफूहरूको माग रहेको धर्नामा सहभागी स्थानीय अगुवा अछरी पोखरेलले बताउनुभयो ।
जिल्ला प्रहरी कार्यालयका प्रवक्ता प्रहरी नायब उपरीक्षक दीपक पातलीका अनुसार शनिबार राति करिब ११ः३५ बजे कोरियनपुरस्थित सडकमा एक महिला आगो लगाएर जलेको भन्ने सूचनापछि निजलाई उद्धार गरेर अस्पताल पु¥याइएको थियो ।
प्रहरीको प्रारम्भिक अनुसन्धानमा महिलाको जलेर मृत्यु भएको देखिए पनि कारण खुल्न सकेको छैन । घटनाको प्रकृति शङ्कास्पद देखिएकाले गम्भीरताका साथ अनुसन्धान सुरु गरिएको प्रवक्ता पातलीले जानकारी दिनुभयो । रासस
