कर्णाली। कर्णाली प्रदेश सरकारका सामाजिक विकासमन्त्री घनश्याम भण्डारीले कर्णालीमा बालबालिका र ज्येष्ठ नागरिक लक्षित कार्यक्रम सञ्चालन गर्न विश्व खाद्य कार्यक्रम (डब्लुएफपी)लाई आग्रह गर्नुभएको छ ।
मन्त्री भण्डारी र विश्व खाद्य कार्यक्रम नेपालका देशीय निर्देशक रियाज लोधीबीच आज सुर्खेत वीरेन्द्रनगरस्थित मन्त्रालयमा भएको भेटघाटमा उहाँले कर्णालीको आयात घटाउने र आत्मनिर्भर बढाउने कार्यक्रमलाई बढावा दिन अनुरोध गर्नुभएको हो ।
भेटमा कर्णालीमा लागु भएको विश्व खाद्य कार्यक्रमको समीक्षा गरिएको थियो। सो अवसरमा मन्त्री भण्डारीले कर्णालीमा जलवायु परिवर्तनको उच्च जोखिमका कारण हिमाली क्षेत्रबाट सिजनअनुसार बसाइँसराइ हुनुपर्ने अवस्था रहेको बताउनुभयो ।
श्रम तथा रोजगारका लागि भारत जाने र शिक्षाका लागि सहर बसाइ सर्ने कारणले खाद्य प्रणालीमा असर परेको उहाँको भनाइ थियो । निर्देशक लोधीले विगतका कार्यक्रमको स्मरण गराउँदै थप कार्यक्रम सञ्चालन गर्न चाहेको बताउनुभएको थियो ।
किसानको उत्पादन र बिक्री गरिएका वस्तुको समयमा भुक्तानी हुन नसक्ने देशभरका समस्या बारे जानकारी गराउँदै यससम्बन्धी काम आफूहरुले गर्न खोजेको उहाँको भनाइ थियो पोषणसम्बन्धी कार्यक्रम कर्णाली प्रदेश केन्द्रित भएको बताउँदै लोधीले आफ्ना सबै कार्यक्रमलाई एकीकृत प्रणालीबाट कार्यान्वयन गर्ने तयारी भइरहेको जानकारी गराउनुभयो । रासस
