काठमाडाैँ ।चितवनकाे कालिका नगरपालिकाले आजदेखि आफ्नै नवनिर्मित प्रशासकीय भवनबाट औपचारिक रूपमा सेवा प्रवाह सुरु गरेको छ ।
नगरपालिकाका प्रमुख विनोद रेग्मीका अनुसार आजदेखि सम्पूर्ण नियमित प्रशासनिक काम नयाँ भवनबाट सञ्चालन गरिएको हो । करिब छ वर्षको अवधिपछि भवन निर्माण सम्पन्न भई सेवा प्रवाह सुरु गरिएको हो ।
निर्माण कम्पनीले विसं २०७६ फागुन १५ गते दुई वर्षभित्र काम सम्पन्न गर्ने गरी ठेक्का सम्झौता गरेको भए पनि निर्धारित समयमा काम पूरा हुन सकेको थिएन । त्यसपछि चार पटकसम्म म्याद थप गरिएको थियो र अन्तिम म्याद २०८१ कात्तिक ३० गतेसम्म विस्तार गरिएको थियो ।
नगरपालिकाले म्याद थप नगर्ने र जरिवाना लिने निर्णय कार्यपालिका बैठक तथा नगर सभाबाट गरेको जनाएको छ । सोअनुसार निर्माण कम्पनीसँग रु एक करोड १६ लाख जरिवाना असुल गरिएको छ ।
प्रमुख रेग्मीका अनुसार रु ११ करोड ५६ लाखको लागतमा आधुनिक सुविधासम्पन्न प्रशासकीय भवन निर्माण गरिएको हो ।
विसं २०७२ असोज १ गते स्थापना भएको कालिका नगरपालिकाले १० वर्षपछि आफ्नै भवनबाट सेवा दिन थालेको हो । नयाँ भवनमा सभाहल, नगर प्रमुख, उपप्रमुख र प्रमुख प्रशासकीय अधिकृतका सचिवालयसहित कार्यकक्ष व्यवस्था गरिएको छ ।
यसका साथै आर्थिक, स्वास्थ्य, कृषि तथा पशु सेवा, सामाजिकलगायत सबै शाखाहरू एउटै भवनबाट सेवा प्रवाह गर्ने व्यवस्था मिलाइएको छ । साविकको जुटपानी, पदमपुर, शक्तिखोर र सिद्धि गाउँ विकास समिति समायोजन गरी नगरपालिकाको संरचना बनेको हो ।
करिब ५२ हजारभन्दा बढी जनसङ्ख्या रहेको यस नगरपालिकामा ब्राह्मण, चेपाङ, तामाङ, थारु, क्षेत्रीलगायत विभिन्न जातजाति तथा समुदायको मिश्रित बसोबास छ ।
नगरपालिकाले आफ्नै प्रशासनिक भवनबाट सेवा सुरु गरेसँगै सेवा प्रवाह थप सहज हुने तथा कर्मचारीको कामकाजमा समेत प्रभावकारीता आउने नगर प्रमुख रेग्मीले विश्वास व्यक्त गरे।
