काठमाडौं । झापाको बिर्तामोडमा नेकपा (एमाले)ले आफ्ना अध्यक्ष तथा पूर्वप्रधानमन्त्री केपी शर्मा ओली को पक्राउको विरोधमा सडक प्रदर्शन गरेको छ।
आज बिर्तामोडस्थित मुक्तिचोकमा आयोजित विरोध प्रदर्शनमा एमालेका विभिन्न जनसंगठन तथा नेता–कार्यकर्ताको उल्लेख्य उपस्थिति रहेको थियो।
पार्टी कार्यालयबाट सुरु भएको ¥याली मुक्तिचोकसम्म पुगेको थियो। प्रदर्शनका क्रममा सहभागीहरूले वर्तमान बालेन्द्र शाह नेतृत्वको सरकारको कदमको तीव्र विरोध गरेका थिए। उनीहरूले ओलीको पक्राउलाई गैरकानुनी तथा प्रतिशोधपूर्ण कदम भन्दै तत्काल रिहा गर्न माग गरेका छन्।
एमालेका अनुसार भदौ २३ र २४ गते भएको जेनजी आन्दोलनसम्बन्धी प्रतिवेदन पूर्वाग्रही ढंगले तयार पारिएको र त्यसकै आधारमा लोकतान्त्रिक शक्तिमाथि धरपकड गरिएको आरोप लगाइएको छ। सोही विरोधमा पार्टी सडक आन्दोलनमा उत्रिएको जनाइएको छ।
मुक्तिचोकमा आयोजित कोणसभालाई सम्बोधन गर्दै एमाले झापाका उपाध्यक्ष शिव ढुङ्गेलले वर्तमान सरकारलाई गल्ती सच्याउन चेतावनी दिएका छन्। उनले विदेशी प्रभावमा सरकार सञ्चालन भइरहेको आरोप लगाउँदै विधि र कानुनको आधारमा देश सञ्चालन गर्न सुझाव दिए। साथै, दुईतिहाइको दम्भ नदेखाउन पनि आग्रह गरेका थिए।
ढुङ्गेलले शान्तिपूर्ण आन्दोलनबाट माग पूरा नभए थप कडा आन्दोलनमा जाने चेतावनी दिँदै एमालेसँग प्रतिशोध साध्ने प्रयास महँगो पर्ने बताएका छन्। पार्टी केन्द्रको निर्देशनअनुसार आन्दोलनका कार्यक्रमलाई निरन्तरता दिने पनि उनले जानकारी दिएका छन्।
एमालेले अध्यक्ष ओलीको तत्काल रिहाइको माग गर्दै देशभर आन्दोलनका कार्यक्रमलाई थप विस्तार गर्ने संकेत गरेको
