काठमाडौँ। बलिङमा उत्कृष्ट प्रदर्शनको प्रेरणामा सुदूरपश्चिम र लुम्बिनी प्रदेशले जारी प्रधानमन्त्री कप पुरुष राष्ट्रिय क्रिकेट प्रतियोगितामा सुखद सुरुआत गरेका छन् ।

जनकपुरमा सोमवार भएको खेलमा लुम्बिनीले कोशी प्रदेशमाथि एक सय ४८ रन र सुदूरपश्चिमले कर्णाली प्रदेशमाथि चार विकेटको जित निकाल्दा बलिङमा उत्कृष्ट प्रदर्शनको साथ रह्यो ।

सुदूरपश्चिमको पहिलो खेल हो भने लुम्बिनी, कर्णाली र कोशीले दोस्रो खेल खेलेका हुन् । लुम्बिनी र कर्णाली तथा कोशी र मधेस प्रदेशबीचको पहिलो खेल वर्षाका कारण प्रभावित भएको थियो । आफ्नो दोस्रो खेलमा बलिङमा उत्कृष्ट साथ पाएपछि लुम्बिनीले जित निकाल्दा कर्णाली र कोशी असफल भए ।

लुम्बिनीको जितममा सन्तोष यादवले अलराउन्ड प्रदर्शन गरे । सुदूरपश्चिमको जितमा पनि तीव्र गतिका बलर हेमन्त धामीको प्रदर्शन महत्वपूर्ण सावित भयो ।

हेमन्तको ६ विकेट प्रेरणामा सुदूरपश्चिमले पहिलो खेलमा नै यादगार जित निकाल्यो । वीरगञ्जमा भएको खेलमा कर्णालीले १२० रनको झिनो लक्ष्य दिएको थियो । जवाफमा सुदूरपश्चिमले २९.२ ओभरमा ६ विकेट गुमाएर लक्ष्य पूरा गर्यो । सुदूरपश्चिमका किरण ठगुन्ना २६ र खडक बोहोरा २३ रनमा आउट भए । मिलन बोहोरा १८ तथा कप्तान शेर मल्ल १० रनमा अविजित रहे ।

कर्णालीले शुरुमा नै दुई विकेट लिँदा चुनौती दिने प्रयास गरे पनि सफल भएन । कर्णालीको बलिङमा अनुज चनरा र कप्तान दिवान पुनले समान दुई तथा दीपेन्द्र रावत र प्रकाश जैसीले समान एक विकेट आफ्नो नाममा राखे । त्यसअघि टस जितेर बलिङ रोजेको सुदूरपश्चिमले कर्णालीलाई ३२ ओभरमा एक सय १९ रनमा अलआउट गर्यो ।

कर्णाली ८६÷३ को अवस्थामा थियो । थप ३३ रन जोड्दा सात विकेट गुमाएपछि कर्णाली सस्तैमा अलआउट भयो । हेमन्तले पछिल्लो सातमध्ये पाँच विकेट लिएका हुन् । कर्णालीका विपिन रावल ३३ र सुनिल धमला २८ तथा अरविन्द घर्ती १३ रनमा आउट भए । यो नै सर्वाधिक ठूलो व्यक्तिगत स्कोर रह्यो । कर्णालीका आठ ब्याटरले दोहोरो अंकमा रन बनाउन सकेनन् ।

सुदूरपश्चिमको बलिङमा हेमन्तले सात ओभरमा एक मेडन राख्दै १६ रन मात्र दिए । कप्तान शेर मल्ल, अशोक धामी, नारायण जोशी र मिलन बोहोराले समान एक विकेट लिए । एक खेलबाट सुदूरपश्चिमको २ अंक र दुई खेलबाट कर्णालीको एक अंक  छ । जनकपुरमा भएको खेलमा सन्तोष यादवको अलराउण्ड प्रदर्शनमा लुम्बिनीले पनि सहज जित निकाल्यो ।

जनकपुरमा कप्तान देव खनालको उत्कृष्ट ब्याटिङमा लुम्बिनीले दुई सय ५० रनको लक्ष्य दिएको थियो । तर, जबाफी लक्ष्य पछ्याएको कोशी ३१.४ ओभरमा एक सय १ रनमा नै अलआउट भयो ।

कोशीका अंकित सुवेदी ३० रन, कप्तान सुजन थपलियाले ११ रन र तल्लो क्रमका ब्याटर दीपेश कँडेलले १५ रन बनाए । यो नै कोशीका लागि व्यक्तिगत दोहोरो अंकको रन रह्यो । कोशीलाई सस्तैमा समेट्न सन्तोष यादवले चार तथा राजेन्द्र बमले तीन र निर्मल गुरुङले दुई विकेट लिए । सन्तोषले अलराण्ड प्रदर्शन गरे र म्यान अफ दी म्याच पनि भए । उनले ब्याटिङमा ४८ रन र बलिङमा सात ओभरमा ११ रन खर्चिएर चार विकेट लिएका हुन् ।

टस हारेर पहिले ब्याटिङ गरेको लुम्बिनीले ४९.३ ओभरमा दुई सय ४९ रनमा अलआउट भएको थियो । कप्तान देवले सर्वाधिक ९२ रन जोडे । १०० बल खेल्दै उनले आठ चौका र एक छक्का प्रहार गरे । सन्तोषले ६२ बलमा तीन चौका प्रहार गरे ।

ओपनर रन्जित खड्का ३५ रनमा आउट हुँदा तल्लो क्रमका ब्याटर राजेन्द्र बम १६ रनमा अविजित रहे । कोशीको बलिङमा कप्तान सुजन थपलियाले ४ तथा दीपेश कँडेलले दुई विकेट लिँदा विपिन महतो र प्रेम कामतले समान एक विकेट नाममा राखे । दुई खेलबाट लुम्बिनीले तीन अंक जोड्दा कोशीको दुई खेलबाट १ अंक छ । –न्युज एजेन्सी नेपाल