काठमाडौं: नेपाली कांग्रेसको केन्द्रीय कार्यसमिति बैठकले सभापति गगनकुमार थापा ले प्रतिनिधिसभा निर्वाचन परिणामको नैतिक जिम्मेवारी लिँदै दिएको राजीनामालाई अस्वीकृत गर्ने निर्णय गरेको छ।
चैत ६ देखि ८ गतेसम्म उपसभापति विश्वप्रकाश शर्मा को अध्यक्षतामा सम्पन्न भएको बैठकले सभापति थापाले दिनु भएको राजीनामालाई अस्वीकृत गर्ने निर्णय गरेको हो ।
बैठकमा ८८ जना सदस्य तथा पदाधिकारीले धारणा राखेका थिए बैठकले पार्टीभित्र स्थिरता कायम राख्न र वर्तमान परिस्थितिमा थापाको नेतृत्व आवश्यक रहेको निष्कर्ष निकालेको हो ।
बैठकले निर्वाचन पराजयका कारणहरू व्यक्तिगत नभई संरचनागत र परिस्थितिजन्य रहेको ठहर गरेको छ। साथै, राजीनामा स्वीकृत गर्दा पार्टीमा अस्थिरता र कार्यकर्तामा मनोबल गिरावट आउने सम्भावना रहेको उल्लेख गरिएको छ। सामूहिक जिम्मेवारीको सिद्धान्त र नेतृत्व निरन्तरताको आवश्यकतालाई पनि प्राथमिकता दिइएको छ।
बैठकले उपसभापति शर्माद्वारा प्रस्तुत २७ बुँदे निर्वाचन परिणामको प्रारम्भिक समीक्षा प्रतिवेदनलाई संशोधनसहित पारित गरिएको छ। समीक्षा अनुसार गुटबन्दी र आन्तरिक असहयोग, गठबन्धन सरकारप्रति जनअसन्तोष, राजनीतिक अस्थिरताको दीर्घ इतिहास जेन–जेड युवाको असन्तुष्टि, डिजिटल प्रभाव र नयाँ शक्तिको उदय निर्वाचनमा पराजयका प्रमुख कारणका रुपमा औंल्याइएको छ।
कांग्रेसले अब आफ्नो सम्पूर्ण ध्यान १५औँ महाधिवेशनतर्फ केन्द्रित गर्ने निर्णय गरेको छ। उक्त महाधिवेशनमार्फत नयाँ नेतृत्व चयन, विधान संशोधन, संगठन पुनर्संरचना तथा भावी रणनीति तय गरिनेपनि जनाएको छ ।
बैठकले निर्वाचन परिणामलाई आत्मसमीक्षाको अवसरका रूपमा लिँदै पार्टी पुनर्निर्माण र सुदृढीकरणमा लाग्न सबै कार्यकर्तालाई आह्वान गरेको छ। एकता, अनुशासन र उच्च मनोबल कायम राख्न जोड दिइएको छ।
बैठकले निर्वाचनमा सहभागी उम्मेदवार, कार्यकर्ता, स्वयंसेवक तथा मतदाताप्रति धन्यवाद व्यक्त गर्दै विजयी उम्मेदवारहरूलाई बधाई ज्ञापन गरेको छ ।
बैठकले मध्यपूर्वमा जारी द्वन्द्वप्रति चिन्ता व्यक्त गर्दै विश्वशान्तिको आवश्यकता औंल्याएको छ। युद्धग्रस्त क्षेत्रमा रहेका नेपालीहरूको सुरक्षाका लागि सरकारको ध्यानाकर्षण गराइएको छ। साथै, ईरानमा नियन्त्रणमा रहेका नेपाली नागरिक अमृत झालाई सकुशल स्वदेश फर्काउन माग गरिएको छ।
त्यस्तै, जेन–जेड प्रदर्शन सम्बन्धी घटनाको छानबिन प्रतिवेदन तत्काल सार्वजनिक गर्न पनि बैठकले माग गरेको छ।
