काठमाडाैँ । भक्तपुरको दुवाकोटमा काठमाडौँ मेडिकल कलेज (केएमसी) अस्पतालले आफ्नो उपचार सेवा विस्तार गर्दै नयाँ शाखा सञ्चालनमा ल्याएको छ।
आइतबार आयोजित एक समारोहकाबिच अस्पतालका सञ्चालक डा. सुनिल शर्माले उक्त अस्पतालको औपचारिक उद्घाटन गरेका हुन्। कार्यक्रममा बोल्दै उनले हृदयघात र मस्तिष्कघातजस्ता जटिल रोगका बिरामीलाई समयमै उपचार उपलब्ध गराउने उद्देश्यका साथ दुवाकोटमा शाखा विस्तार गरिएको बताए ।
डा. शर्माका अनुसार यो सामान्य अस्पताल नभई ‘सुपर स्पेसियालिटी’ सेवा प्रदान गर्ने अस्पताल हो। काठमाडौँ उपत्यकाभित्र सीमित केही अस्पतालमा मात्र सम्भव हुने उपचार सेवा अब दुवाकोटमै उपलब्ध हुने उनले उल्लेख गरे। आकस्मिक अवस्थामा बिरामीलाई टाढा अस्पताल पुर्याउँदा लाग्ने समय बचाउन र छिटो उपचार सुनिश्चित गर्न यस्तो सेवा सुरु गरिएको उनको भनाइ थियो।
उनले हृदयघात भएको अवस्थामा एम्बुलेन्स बोलाउने, ट्राफिक जामका कारण अस्पताल पुग्न ढिलाइ हुने जस्ता समस्या न्यूनीकरण गर्ने लक्ष्यसहित अस्पताल सञ्चालनमा ल्याइएको स्पष्ट पारे। दुवाकोटमै केही मिनेटभित्र मुटुको उपचार सेवा उपलब्ध गराउन सकिने व्यवस्था मिलाइएको उनले दाबी गरे।
त्यस्तै, मस्तिष्कघातका बिरामीका लागि टाउको नचिरीकन हात वा खुट्टाको नशामार्फत तार र बेलुन प्रयोग गरी उपचार गर्ने प्रविधि पनि अस्पतालमा उपलब्ध रहेको जानकारी दिइयो। यस्तो प्रविधि नेपालमा विगतमा सहज रूपमा उपलब्ध नभए पनि अहिले सम्भव बनाइएको डा. शर्माले बताए।
अस्पतालमा मुटु, मिर्गौला र मस्तिष्कसम्बन्धी जटिल रोगहरूको उपचारका लागि अत्याधुनिक उपकरण जडान गरिएको जनाइएको छ। साथै अति विपन्न वर्गका बिरामीका लागि निःशुल्क औषधि उपचारको व्यवस्था समेत गरिएको अस्पताल प्रशासनले जनाएको छ।
