बलिउड अभिनेत्री सोनाक्षी सिन्हाले आफू अभिनीत चलचित्र ‘दबंग ३’ को कमाइभन्दा भारतमा जारी राष्ट्रव्यापी प्रदर्शन महत्वपूर्ण भएको बताएकी छन् । भारतमा अहिले नागरिकता संशोधन कानुनको विरोधमा देशभर प्रदर्शन भइरहेको छ । जसमा २३ भन्दा बढीले ज्यान गुमाइसकेका छन् ।
अभिनेत्री सोनाक्षीले भनिन्, ‘दबंग ३ को पहिलो दिनको कमाइबारे भन्दा देशभर भइरहेका प्रदर्शनबारे छलफल गर्नु महत्वपूर्ण छ ।’ बलिउड अभिनेता सलमान खानको चलचित्र ‘दबंग ३’ ले बक्स अफिसमा दुई दिनमै करिब ४९ करोड भारतीय रुपैयाँको व्यापार गरेको छ ।
पहिलो दिन २४।५ करोडको व्यापार गरेको यो चलचित्रले दोस्रो दिन पनि त्यसकै हाराहारीमा कमाएको भारतीय सञ्चारमाध्यमले उल्लेख गरेका छन् । सलमानकै निर्माणमा बनेको यस चलचित्रको निर्देशन प्रभु देवाले गरेका हुन् । जसमा सलमान, अभिनेत्री सोनाक्षी सिन्हा, साई मान्जरेकरलगायतका कलाकारको मुख्य भूमिका छ ।
