काठमाडौँ । लालीबजार चलचित्रको प्रदर्शन तत्कालका लागि रोक्न उच्च अदालत पाटनले आदेश दिएको छ।
मंगलबार न्यायाधीश प्रकाश ढुंगानाको एकल इजलासले आगामी २२ वैशाखसम्म फिल्म प्रदर्शन नगर्न अन्तरिम आदेश जारी गरेको अदालतका सूचना अधिकारी गोविन्दप्रसाद कोइरालाले जानकारी दिएका छन्।
वादी समुदायको तर्फबाट रोशनी नेपालीले चलचित्रका केही शब्द र प्रस्तुतिमा आपत्ति जनाउँदै रिट दायर गरेपछि अदालतले सो आदेश दिएको हो। उक्त फिल्म १८ वैशाखदेखि प्रदर्शन गर्ने तयारीमा थियो।
निर्देशक यम थापाको निर्देशनमा निर्माण भएको फिल्म षट्कोण आर्टसको ब्यानरमा बनेको हो। फिल्मको कथावस्तु वादी समुदायका महिलाले भोग्ने संघर्षमा केन्द्रित छ। यसअघि सोमबार मात्र केन्द्रीय चलचित्र जाँच समिति ले ‘लालीबजार’ लाई युनिभर्सल प्रमाणपत्र प्रदान गरेको थियो। अदालतको आदेशपछि फिल्मको प्रदर्शन अनिश्चित बनेको छ।
