काठमाडौँ । नेपाल प्रहरी ले हुण्डी तथा अवैध मुद्रा कारोबारमा संलग्न रहेको आरोपमा दुई जनालाई नगद रकमसहित पक्राउ गरेको छ।
जिल्ला प्रहरी परिसर काठमाडौं ले आज जारी गरेको प्रेस विज्ञप्तिअनुसार काठमाडौँ महानगरपालिका–८ भिमढुंगा क्षेत्रमा अवैध मुद्रा कारोबार भइरहेको सूचनाको आधारमा प्रहरी टोली खटिएको थियो। सो क्रममा प्रहरीले रु १ करोड १६ लाख नगदसहित दुई जनालाई नियन्त्रणमा लिएको हो।
पक्राउ पर्नेमा काठमाडौँ महानगरपालिका–८ भिमढुंगा बस्ने २८ वर्षीय सागर गिरी र २८ वर्षीय प्रमोद प्रसाद धिताल रहेका छन्। उनीहरूले हुण्डी तथा अवैध मुद्रा कारोबार गरिरहेको आशंकामा प्रहरीले थप अनुसन्धान अघि बढाएको जनाएको छ।
प्रहरीका अनुसार पक्राउ परेकाबाट विभिन्न बैंकका व्यक्तिको नाममा रहेका तीन थान चेकबुक, विभिन्न व्यक्तिका नाममा काटिएका रु २७ लाख ३० हजार बराबरका तीन थान चेक, विभिन्न बैंकका चार थान एटीएम कार्ड, एक थान नागरिकता, दुई थान चारपाङ्ग्रे सवारीसाधन, एक थान दुईपाङ्ग्रे सवारीसाधन, तीन थान सवारी दर्ता किताब, छ थान मोबाइल फोन, ३९ थान एनसेल र एनटिसीका सिमकार्ड तथा एक थान कम्प्युटर सेट बरामद गरिएको छ।
त्यस्तै, प्रहरीका अनुसार बाइनान्स खातामा रहेको ७,१७५.३४ USDT समेत फेला परेको छ।
घटनाबारे थप अनुसन्धान भइरहेको प्रहरीले जनाएको छ।
