काठमाडौं । सरकारको गुनासो व्यवस्थापन प्रणाली ‘हेलो सरकार’मा प्रहरी र स्थानीय तहसँग सम्बन्धित गुनासा बढी आउने गरेको पाइएको छ । प्रधानमन्त्री तथा मन्त्रिपरिषद् कार्यालय मातहतको ‘हेलो सरकार’ शाखाका अनुसार चालू आर्थिक वर्ष सुरुवातदेखि सोमबारसम्म १ हजार ४ सय ४२ संख्यामा गुनासा दर्ता भएका छन् । यीमध्ये नेपाल प्रहरी र स्थानीय तहले सम्बोधन गर्नुपर्ने प्रकृतिका उजुरी बढी छन् ।
शाखा प्रमुख उपसचिव शेखर पौडेलका अनुसार घुस लेनदेन, प्रहरीले उजुरी लिन नमानेको, कारबाही नगरेको र प्रहरीका व्यक्तिगत आचरणसम्बन्धी र विभिन्न घटनालगायतका गुनासा आउने गरेका छन् । चालू आर्थिक वर्ष सुरुदेखि सोमबारसम्म प्रहरीसँग सम्बन्धित १ सय ७६ गुनासा दर्ता भएको भएको छ । यो संख्या उजुरी परेका कार्यालयमध्ये सबैभन्दा बढी हो ।
त्यस्तै, उजुरी व्यवस्थापनतर्फ समेत नेपाल प्रहरीको कार्यसम्पादन उत्कृष्ट रहेको ‘हेलो सरकार’को भनाइ छ ।
प्रहरीसँग सम्बन्धित गुनासा ‘प्रहरीको चेन अफ कमान्ड’का कारण प्रधान कार्यालयमा पठाइने र प्रधान कार्यालयमार्फत सम्बन्धित कार्यालयमा गुनासो व्यवस्थापन भएको छ । ‘प्रहरीसँग सम्बन्धित गुनासा छिटोछरितो रूपमा व्यवस्थापन हुने गरेको छ,’ शाखा प्रमुख पौडेलले भने, ‘देशभर ठूलो कार्यक्षेत्रका कारण बढी प्रहरीसँग सम्बन्धित उजुरी परेको छ ।’ यसैगरी, स्थानीय तहसम्बन्धित गुनासासमेत उच्च रहेको छ ।
कर्मचारी अभाव, विकास निर्माणमा अनियमितता र भ्रष्टाचार, जनप्रतिनिधि र कर्मचारीको सेवासुविधा र सवारीसाधन मोह, कागजपत्र नबनाइदिएको, सेवा प्रवाहमा सुस्ततालगायतका गुनासा आउने गरेका छन् । स्थानीय तहसँग सम्बन्धित सबैभन्दा बढी गुनासा काठमाडौं महानगरपालिकाको छ । ‘हेलो सरकार’ले बढी उजुरी आउने कार्यालयको दोस्रो नम्बरमा महानगर परेको छ । त्यहा“ सोमबारसम्ममा ८२ उजुरी दर्ता भएका छन् । महानगरसँग सडकको अवस्था, सेवाप्रवाह तथा होडिङ बोर्डलगाायतका विषयमा उजुरी पर्ने गरेका छन् ।
त्यस्तै, उजुरी बढी दर्ता हुने अन्य कार्यालयमा त्रिभुवन विश्वविद्यालय, सडक विभाग, नेपाल विद्युत् प्राधिकरण र नेपाल टेलिकमलगायत छन् । तर, उजुरी सम्बोधनमा भने सुस्तता देखिएको छ । सोमबारसम्म परेका उजुरीमध्ये ३ सय ७६ गुनासा फर्छ्यौट र १ सय ६४ मात्र गुनासा सम्बोधन भएका छन् । बाँकी सम्बोधन प्रक्रियामा रहेको छ ।
चार हजार कार्यालयमा सञ्जाल: ‘हेलो सरकार’ले देशभरका संघीय, प्रदेश र स्थानीय तह गरी झन्डै ४ हजार कार्यालयमा सञ्जाल विस्तार गरेको छ । प्रदेश कार्यालयमातहत व्यवस्थित भइनसकेकाबाहेक सबै तहका कार्यालयमा सञ्जाल विस्तार भइसकेको हेलो सरकार शाखा प्रमुख पौडेलले बताए । पछिल्लो समय गुनासा व्यवस्थापनका लागि ‘नयाँ पोर्टल’अनुसार सम्बोधनमा समबन्धित कार्यालयलाई नै जिम्मेवार बनाउने गरिएको छ ।
‘हेलो सरकार’ले पछिल्लो समय सामाजिक सञ्जालमार्फत बढी मात्रामा उजुरी आउने गरेको पनि जनाएको छ । पछिल्लो समय गुनासा व्यवस्थापन प्रभावकारी बनाउन ‘नागरिक एप’ र ‘हेलो सरकार’ गुनासो विद्युतीय गुनासो व्यवस्थापन निर्देशिका जारी हुने क्रममा छ । गुनासोका प्रकृति सडक, पुल, कर्मचारी सम्बन्धित, विद्युत्, यातायात व्यवस्था कार्यालय, सामाजिक सञ्जाल दुरुपयोग र पछिल्लो समय सार्वजनिक जग्गा अतिक्रमण कृटपिटलगायतका उजुरी बढी मात्रामा आउने गरेका छन् । राजधानी दैनिकबाट
