काठमाडौँ । काठमाडौँ झेङ्जी परम्परागत धनुविद्या संघको प्रतिनिधिमण्डलले चीनको कुनमिङ शहरको भ्रमण गरी सांस्कृतिक तथा खेलकुद आदान–प्रदान कार्यक्रम सम्पन्न गरेको छ। उक्त कार्यक्रम चीनको कुनमिङ हुइशी शिक्षा समूहसँगको सहकार्यमा आयोजना गरिएको हो।
चीन–नेपाल कूटनीतिक सम्बन्ध स्थापनाको ७०औँ वर्षको अवसरमा आयोजित कार्यक्रम कुनमिङस्थित हुइशी शिक्षा समूहको लियनहुआछी क्याम्पसमा सुरु भएको थियो। कार्यक्रममा दुवै देशका शिक्षा, संस्कृति र खेलकुद क्षेत्रका प्रतिनिधिहरू सहभागी भएका थिए।
टोलीमा राजिव महर्जन, राज कुमार राई, तेम्बा भोटे, शंकर भुजेल, उमेश महर्जन र राज महर्जन रहनुभएको छ।
कार्यक्रमअन्तर्गत नेपाली टोलीले युनान प्रान्तको अमूर्त सांस्कृतिक सम्पदासँग सम्बन्धित ‘बान कपर’ (परम्परागत तामाको कलात्मक काम) का प्रसिद्ध कलाकार ली होङगाङको कार्यशाला अवलोकन गरेको थियो। टोलीले तामाका कलात्मक सामग्री नजिकबाट अवलोकन गर्दै यसको निर्माण प्रक्रिया र ऐतिहासिक परम्पराबारे जानकारी लिएको थियो।
त्यसपछि दुवै पक्षबीच सांस्कृतिक तथा खेलकुद आदान–प्रदानसम्बन्धी अन्तरक्रिया कार्यक्रम आयोजना गरिएको थियो। हुइशी शिक्षा समूहका अध्यक्ष झाङ होङवेईले नेपाली टोलीलाई स्वागत गर्दै सन् २०१२ मा नेपाल भ्रमण गरेको अनुभव स्मरण गरे। उनले दक्षिण तथा दक्षिणपूर्व एशियासँग सहकार्य विस्तार गर्ने लक्ष्यसहित शिक्षा, संस्कृति र खेलकुद क्षेत्रमा सहकार्य बढाउने अपेक्षा व्यक्त गरे।
अनुसन्धान संस्थानका अध्यक्ष छेन दानले विद्यालयस्तरमा परम्परागत धनुविद्या प्रशिक्षणको मोडेल र पाठ्यक्रमबारे जानकारी दिँदै दुवै देशबीच अनुभव आदान–प्रदान गर्न सकिने बताए।
कार्यक्रममा राजिव महर्जनले चिनियाँ पक्षको आतिथ्यताप्रति धन्यवाद व्यक्त गर्दै यस्तो सहकार्यलाई नियमित बनाउनुपर्ने धारणा राखे।
यसैगरी कुनमिङ झेङ्जी आर्चरी क्लबका प्रतिनिधि कोंग वेइझोङले परम्परागत धनुविद्या चीन र नेपालका जनताबीचको सांस्कृतिक सम्बन्ध जोड्ने महत्वपूर्ण माध्यम भएको बताए। उनले दुवै देशले मिलेर परम्परागत धनुविद्याको विकासका लागि साझा प्रणाली निर्माण गर्न सक्ने उल्लेख गरे।
यो कार्यक्रमले चीन र नेपालबीच जनस्तरमा सांस्कृतिक तथा खेलकुद आदान–प्रदानलाई बलियो बनाएको आयोजकहरूले बताएका छन्। दुवै पक्षले आगामी दिनमा पनि यस्तो सहकार्यलाई निरन्तरता दिने प्रतिबद्धता व्यक्त गरेका छन्।
नेपाल र चीनबीच परम्परागत धनुविद्यालगायत खेलकुद तथा सांस्कृतिक क्षेत्रमा सहकार्य बढाउने प्रयास विगत केही वर्षदेखि हुँदै आएको छ।
