काठमाडौँ । स्वास्थ्य तथा जनसङ्ख्यामन्त्री डा. सुधा गौतमले कर्णाली र सुदूरपश्चिम प्रदेशलाई आयुर्वेद औषधिको अनुसन्धान र उत्पादन केन्द्रका रूपमा विकास गर्नुपर्ने आवश्यकता औंल्याएकी छन् ।
फार्मा एक्स्पोमा उद्योगी र व्यवसायीहरूलाई सम्बोधन गर्दै मन्त्री गौतमले भनिन्, “नेपालका हिमाली तथा उच्च पहाडी भेगमा पाइने बहुमूल्य जडीबुटीको सदुपयोग गर्दै आयुर्वेद औषधि उत्पादनमा देशलाई आत्मनिर्भर बनाउने सरकारको दीर्घकालीन सोच छ।”
उनका अनुसार एलोपेथिक (आधुनिक) औषधिको उत्पादन मुख्य रूपमा मध्य र पूर्वी नेपालमा केन्द्रित रहेकाले अब आयुर्वेदलाई पश्चिम नेपालमा विस्तार गर्नुपर्ने आवश्यकता छ। यसले देशको सन्तुलित विकासमा सहयोग पुर्याउने र नेपाललाई आवश्यक पर्ने सबै प्रकारका औषधि स्वदेशमै उपलब्ध गराउने विश्वास मन्त्री गौतमले व्यक्त गरिन्।
हालै जुम्लाको भ्रमणपछि फर्किनुभएका मन्त्रीले भनिन्, “हाम्रो जडीबुटी सबै हिमालमा पाइन्छ। जुम्लास्थित मेडिकल कलेज र इन्स्टिच्युटहरूमा आयुर्वेदिक अनुसन्धान र खोजलाई तीव्रता दिनुपर्छ। अहिले अधिकांश औषधि उद्योग र प्रयोगशालाहरू बारा, पर्सा र गण्डकी प्रदेशमा केन्द्रित छन्। अब आयुर्वेदिक उत्पादनलाई पश्चिम, सुदूरपश्चिम र कर्णालीतिर विस्तार गर्नुपर्छ। यहाँ आधुनिक औषधि बन्छ, त्यहाँ आयुर्वेदिक औषधि। अनि हामीलाई चाहिने सबै कुरा यहीँ पाउँछौँ। नेपालको भविष्यको चित्र मेरो आँखामा बत्ती जस्तै उज्यालो देखिन्छ।”
मन्त्री गौतमले आयुर्वेद, भेटेरिनरी र श्रृङ्गार प्रसाधनका क्षेत्रमा पनि राम्रो सम्भावना रहेको उल्लेख गर्दै उद्योगीहरूलाई अनुसन्धानमा लगानी बढाउन र स्थानीय कच्चा पदार्थको अधिकतम उपयोग गर्न आग्रह गरिन् । उनका अनुसार सबैले एउटै दृष्टिकोण बनाएर काम गरे नेपाल छिट्टै औषधि र जडीबुटीको क्षेत्रमा विश्वमै चिनिनेछ।
