काठमाडौँ । नेकपा एमालेका अध्यक्ष केपी शर्मा ओलीले यसपटकको निर्वाचनमा अपेक्षित परिणाम प्राप्त गर्न नसकेको बताएका छन् । पूर्वप्रधानमन्त्रीसमेत रहेका ओलीले सामाजिक सञ्जालमार्फत निर्वाचन परिणामलाई सम्मानपूर्वक स्वीकार गर्ने बताएका हुन्।
झापा–५ बाट उम्मेदवार बनेका ओली यसपटकको निर्वाचनमा पराजित भएका छन्। परिणाम सार्वजनिक भएपछि उनले लोकतन्त्रमा अन्तिम फैसला जनताकै हुने भन्दै त्यसलाई शिरोधार्य गर्नु आफू र आफ्नो पार्टीको कर्तव्य भएको उल्लेख गरेका छन्।
सामाजिक सञ्जालमा उनले सूर्य चिन्हमा मतदान गरेर आफ्नो पक्षमा उभिएका मतदाता, नेता, कार्यकर्ता, स्वयंसेवक, शुभेच्छुक तथा समर्थकप्रति हार्दिक धन्यवाद व्यक्त गरेका छन्। जनताको विश्वास नै आफ्नो शक्ति र साथ नै आफ्नो ताकत भएको उनको भनाइ छ।
निर्वाचनको परिणाम आफ्नो पक्षमा नआए पनि जनताप्रतिको प्रतिबद्धता र सेवाभाव भने कमजोर नहुने उनले बताएका छन्। जनताकै बिचमा रहेर जनताकै लागि काम गर्दै विश्वासको सम्बन्ध अझ बलियो बनाउँदै अघि बढ्ने प्रतिबद्धता उनले व्यक्त गरेका छन्।
