काठमाडौं । वैदेशिक रोजगारीका लागि ग्रीस पठाइदिने भन्दै ठगी गरेको आरोपमा एक युवकलाई प्रहरीले पक्राउ गरेको छ। काठमाडौं उपत्यका अपराध अनुसन्धान कार्यालय टेकुका अनुसार ग्रिस पठाइदिन्छु भनी रकम असुल गरी ठगी गर्ने २२ वर्षीय सञ्जोग राई पक्राउ परेका हुन्।
प्रहरीका अनुसार राईले बेरोजगार युवायुवतीहरूलाई आकर्षक तलब हुने प्रलोभन देखाई वैदेशिक रोजगारीका लागि ग्रिस पठाइदिने भन्दै रकम उठाएका थिए। लामो समयसम्म विदेश नपठाई सम्पर्कविहीन भएपछि पीडितहरूले उजुरी दिएका थिए।
उजुरीका आधारमा अनुसन्धान गर्दा मोरङ जिल्ला पथरी शनिश्चरे नगरपालिका–३ स्थायी घर भएका र हाल ललितपुर महानगरपालिका क्षेत्रमा बस्दै आएका राईलाई प्रहरीले ललितपुरबाट पक्राउ गरेको जनाएको छ।
प्रहरीका अनुसार उनले तीन जना पीडितबाट २५ लाख रुपैयाँ ठगी गरेको खुलेको छ। पक्राउ परेका राईलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले जनाएको छ।
वैदेशिक रोजगारीको नाममा ठगीका घटना बढ्दै गइरहेका कारण प्रहरीले यस्ता प्रलोभनमा नपर्न र आधिकारिक प्रक्रियामार्फत मात्र वैदेशिक रोजगारीमा जान सर्वसाधारणलाई आग्रह गरेको छ।
