काठमाडाैँ । फागुन २१ गते सम्पन्न प्रतिनिधि सभा सदस्य निर्वाचनको मतगणना कार्य अन्तिम चरणमा पुगेको छ ।
निर्वाचन आयोगकाअनुसार प्रत्यक्षतर्फका अधिकांश निर्वाचन क्षेत्रको अन्तिम नतिजा सार्वजनिक भइसकेको छ भने समानुपातिकतर्फको मतगणना पनि तिब्र गतिमा अघि बढिरहेको छ ।
निर्वाचन आयोगका प्रवक्ता नारायणप्रकाश भट्टराईले दिनुभएको पछिल्लो जानकारीअनुसार प्रत्यक्षतर्फ कुल १ सय ६५ सिटमध्ये १ सय ५५ सिटको अन्तिम नतिजा घोषणा भइसकेको छ । अब बाँकी रहेका १० वटा निर्वाचन क्षेत्रमा मात्र मतगणना जारी रहेको र त्यहाँको काम पनि द्रुत गतिमा भइरहेको छ ।
मतगणनामा कुनैपनि प्रकारको प्राविधिक वा अन्य अवरोध नआएको खण्डमा आज रातिसम्म वा ढिलोमा भोलिसम्ममा प्रत्यक्षतर्फको सम्पूर्ण नतिजा सार्वजनिक भइसक्ने आयोगको भनाइ छ ।
प्रत्यक्षतर्फको मतगणना सम्पन्न भइसकेका निर्वाचन क्षेत्रहरूमा आयोगले तत्कालै समानुपातिकतर्फको मतगणना शुरु गरिसकेको बताए । प्रवक्ता भट्टराईकाअनुसार हालसम्म समानुपातिकतर्फ ४० लाखभन्दा बढी मत गणना भइसकेको छ । देशभरका मतगणना स्थलहरूमा कर्मचारीहरू निरन्तर खटिरहेकाले आगामी तीन दिनभित्र समानुपातिकतर्फको पनि सम्पूर्ण मतगणना सम्पन्न हुने आयोगको अनुमान छ ।
मतगणना कार्यलाई छिटो, छरितो र पारदर्शी बनाउन आयोगले सबै संयन्त्रहरूलाई प्रभावकारी रूपमा परिचालन गरेको प्रवक्ता भट्टराईले बताए।
प्रत्यक्षतर्फको नतिजा अन्तिम चरणमा पुगेसँगै अब आम नागरिक र राजनीतिक दलहरूको ध्यान समानुपातिकतर्फको मतपरिणाम र त्यसले निर्धारण गर्ने राष्ट्रिय दलको मान्यता तथा सिट बाँडफाँडतर्फ केन्द्रित भएको छ ।
