मेलबोर्नः इङल्यान्ड र अस्ट्रेलियाबीचको तेस्रो टेस्ट क्रिकेटमा इङल्यान्ड पराजय नजिक पुगेको छ ।
मेलबोर्न क्रिकेट मैदानमा भइरहेको खेलमा इङल्यान्डले दोस्रो दिनको खेल समाप्त हुँदा दोस्रो इनिङमा चार विकेट गुमाएर ३१ रन मात्र बनाएको छ । इङल्यान्ड अझै पनि ५१ रनले पछि छ ।
टस हारेर पहिले ब्याटिङको निम्तो पाएको इङल्यान्डको पहिलो पारी १८५ रनमै समेटिएको थियो । पहिलो दिन ६५.१ ओभरमै इङल्यान्डको पारी समाप्त भएको थियो । इङल्यान्डका लागि कप्तान जो रुटले सर्वाधिक ५० रन बनाएका थिए ।
अस्ट्रेलियाका लागि प्याट कमिन्स र नाथन लायनले समान तीन तीन विकेट लिएका थिए भने मिचेल स्टार्कले २, स्कट बोलान्डले १ तथा क्यामरुन ग्रीनले १ विकेट लिएका थिए ।
पहिलो दिन नै पारि शुरु गरेको अस्ट्रेलियाले पनि खासै उल्लेखनीय खेल प्रदर्शन गर्न सकेको थिएन । तैपनि अस्टे«लियाले सबै विकेट गुमाएर २६७ रन बनाएर ८२ रनको अग्रता लिएको थियो ।
अस्ट्रेलियाका ओपनर मार्कस ह्यारिसले सर्वाधिक ७६ रन बनाएका थिए । इङल्यान्डका बलरहरु जेम्स एन्डरसनले ४, ओल्ली रबिनसन र मार्क उडले समान दुई दुई तथा बेन स्टोक र ज्याक लिचले समान एकएक विकेट लिएका थिए ।
दोस्रो दिन दोस्रो इनिङ थालेको इङल्यान्डका लागि सुखद शुरुवात भएन । हासिब हमिद ७, ज्याक क्रलीले ५ र डाविड मलान एवं ज्याक लिच बिना रन बनाई आउट भएका छन् । इङल्यान्डको इनिङ ध्वस्त पार्ने क्रममा मिचेल स्टार्क र स्कट बोलान्डले दुई दुई विकेट लिएका छन् ।
क्रिजमा कप्तान जो रुट (१२ रन) र बेन स्टोक्स (२) छन् ।
यसअघि एडिलेडमा भएको पहिलो टेस्ट खेलमा अस्ट्रेलिया २७५ रनले विजयी भएको थियो भने ब्रिस्बेनमा भएको दोस्रो टेस्टमा पनि अस्ट्रेलिया ९ विकेटले विजयी भएको थियो ।
एसेज शृंखलामा दुई टिमबीच पाँच वटा टेस्ट खेल हुँदैछन् ।
