काठमाडाैँ । प्रतिनिधि सभा सदस्यको निर्वाचन पश्चात देशभरका अधिकांश निर्वाचन क्षेत्रमा मतगणना कार्य जारी रहेको छ। निर्वाचन आयोगका सहायक प्रवक्ता कुलबहादुर जी.सी. का अनुसार मुगु जिल्ला बाहेक अन्य ७६ जिल्लामा मतगणना भइरहेको छ।
उहाँले बताउनुभयो कि भौगोलिक विकटताका कारण मुगुमा मतपेटिका ढुवानीमा ढिलाइ भएको थियो र शनिबार विहान मात्रै ढुवानी कार्य सकिएको छ। हाल सर्वदलीय बैठक बसिरहेको र अपरान्ह ४ बजेदेखि मतगणना सुरु हुने जानकारी प्राप्त भएको छ।
सङ्खुवासभा र गोरखा जिल्लामा पनि मतपेटिका शनिबार विहान मात्रै हेलिकप्टरमार्फत ढुवानी गरिएको छ। ती दुवै जिल्लामा मतगणना अहिले सुरु भइसकेको छ।
निर्वाचन आयोगका अनुसार मतगणनासँगै परिणाम आउने क्रम पनि जारी छ। हालसम्म आयोगको प्रणालीमा ५४ जिल्लाको मतपरिणाम प्राप्त भइसकेको छ। सहायक प्रवक्ताले अपेक्षा व्यक्त गर्नुभयो कि शनिबार साँझसम्म धेरै निर्वाचन क्षेत्रको परिणाम सार्वजनिक हुने छ भने, केही निर्वाचन क्षेत्रको अन्तिम परिणाम आईतबार साँझसम्म सार्वजनिक गरिसक्ने सम्भावना छ।
समानुपातिकतर्फको मतगणना पनि प्रत्यक्षतर्फको मतगणना सम्पन्न भएका क्षेत्रहरूमा सँगसँगै भइरहेको छ। अहिलेसम्म देशभरबाट करिब तीन लाख मत समानुपातिकतर्फ गन्न सकिएको छ।
सहायक प्रवक्ता कुलबहादुर जी.सी.ले भने, “हालसम्म देशभरका सबै निर्वाचन क्षेत्रमा मतगणना कार्य जारी छ। मुगु जिल्ला बाहेक सबै क्षेत्रमा मतगणना सुरु भइसकेको छ। मतगणनासँगै परिणाम आउने क्रम पनि जारी छ। समानुपातिकतर्फ अहिलेसम्म करिब तीन लाख मतगणना भइसकेको छ।”
