काठमाडाैँ । नेकपा एमालेका उपमहासचिव योगेश भट्टराईले देशलाई मियो बिनाको दाइ जस्तो अवस्थाबाट जोगाउन आगामी निर्वाचनमा एमालेको जित अनिवार्य रहेको बताएका छन्।
झापा–५ अन्तर्गत दमकमा प्रेस चौतारी नेपालले आयोजना गरेको पत्रकार भेटघाट कार्यक्रममा बोल्दै भट्टराईले राष्ट्रिय तथा अन्तर्राष्ट्रिय रूपमा विकसित चुनौतीहरूको सामना गर्न सक्षम राजनीतिक शक्तिले नै निर्वाचन जित्नुपर्ने धारणा राखे।
चुनावी मैदानमा देखिएका केही उम्मेदवारका कारण देशमा थप अस्थिरता निम्त्याउने प्रयास भइरहेको आरोप लगाउँदै उनले त्यस्ता पात्रहरूका कारण देश दिशाहीन बन्ने जोखिम रहेको बताए। “त्यो अवस्था आउन नदिन एमाले र अध्यक्ष केपी शर्मा ओलीको विजय आवश्यक छ,” उनले भने।
देशलाई जुवाको अखडा बनाउन खोज्ने प्रवृत्ति चुनावमा देखिएको उल्लेख गर्दै भट्टराईले केही उम्मेदवार र दलहरूमा जिते उत्साह मनाउने र हारे निराश हुने बाहेक स्पष्ट उद्देश्य नरहेको दाबी गरे। उनले जेनजी आन्दोलनबाट भएको क्षतिको दोष जबर्जस्ती एमालेमाथि थोपर्ने प्रयास भएको पनि बताए। “देशलाई ध्वस्त बनाउने गतिविधिमा संलग्नहरू नै आज कुन नैतिकताले उम्मेदवार बनेका छन्?” उनले प्रश्न गरे।
कार्यक्रममा पार्टी केन्द्रीय सदस्य तथा निर्वाचन परिचालन समितिका संयोजक देवेन्द्र दाहालले अघिल्लो निर्वाचनझैँ फराकिलो मतान्तरले झापा–५ बाट एमाले अध्यक्ष ओली विजयी हुने दाबी गरे। झापा–५ बाट निरन्तर ओली उम्मेदवार बन्नु क्षेत्रका मतदाताका लागि अवसर भएको उनको भनाइ थियो।
त्यसैगरी क्षेत्रीय चुनाव प्रचार उपसमिति संयोजक तथा पार्टी केन्द्रीय सदस्य इन्द्र भण्डारीले दमकसहित क्षेत्रभरि भइरहेको सशक्त जनपरिचालन र मतदाताको सक्रियताले एमालेको जित सुनिश्चित गरेको बताए।
