काठमाडौ। मध्यपूर्वका देशहरूमा बढेको तनावको प्रत्यक्ष असर नेपालको हवाई यातायातमा देखिएको छ । उक्त क्षेत्रका विभिन्न सात वटा विमानस्थलमा अन्तर्राष्ट्रिय उडान रद्द भएपछि त्रिभुवन अन्तर्राष्ट्रिय विमानस्थलबाट सञ्चालन हुँदै आएका उडानहरू पनि प्रभावित भएका छन् ।
सारजहा, दोहा, दुबई, कुवेत सिटी, आबुधाबी, कतार र दमाम विमानस्थलमा हवाई उडानमा प्रतिबन्ध लगाइएकाले नेपालबाट ती गन्तव्यतर्फका उडान रद्द गरिएको हो । उडान अचानक रद्द हुँदा शनिबारदेखि नै यात्रुहरू अलपत्र परेका छन् ।
उडानको स्पष्ट जानकारी नपाउँदा आइतबार बिहान राजधानीको हात्तिसारस्थित कतार एयरलाइन्सको कार्यालयमा यात्रुहरूको भीड लागेको छ । उडान कहिले खुल्ने, टिकटको अवस्था के हुने भन्ने अन्योलका कारण यात्रुहरू कार्यालय वरपर यताउता गरिरहेका देखिन्छन् । उडान रद्दले वैदेशिक रोजगारी, उपचार र अध्ययनका लागि विदेश जान लागेका यात्रुहरू थप समस्यामा परेका छन् ।
