गोरखा । नेपाली कांग्रेसका गोरखा क्षेत्र नम्बर १ का उम्मेदवार प्रेमबहादुर खत्रीबारे भ्रामक र कपोलकल्पित समाचार प्रकाशन गरिएको भन्दै एस दी हिमालयले आपत्ति जनाएको छ । उक्त हिमालयका सञ्चालकसमेत रहेका खत्रीमाथि प्रहरीको केन्द्रीय अनुसन्धान ब्युरोको हवाला दिँदै छानबिन भइरहेको भन्ने समाचार आएसँगै आपत्ति जनाइएको हो ।
खत्रीमाथि कुनै पनि अनुसन्धान हालसम्म नभएको र चुनावलाई प्रभावित गर्न चरित्र हत्या गर्ने गरी प्रचार प्रसार भएको भनी कम्पनीले आपत्ति जनाएको हो ।
एस दी हिमालयका महाप्रबन्धक सुजन खत्रीले प्रेस विज्ञप्ति जारी गर्दै यस्ता भ्रामक समाचारप्रति भ्रममा नपर्न अनुरोध गरेका छन् । उनले कम्पनीका सञ्चालक खत्री विगत डेढ दशकभन्दा बढी समयदेखि “राजनीति पेशा होइन, सेवा हो” भन्ने मूल मन्त्रका साथ विभिन्न सामाजिक कार्यमा सक्रिय रहँदै आएको बताएका छन् ।
ध्यानाकर्षण पत्रमा भनिएको छ, “विशेषगरी “एस दी हिमालयका सञ्चालक प्रेमबहादुर खत्रीमाथि छानबिन सुरु” भन्ने शीर्षकमा प्रकाशित समाचार पूर्णतः असत्य, आधारहीन र भ्रामक रहेको स्पष्ट पार्न चाहन्छौं। उक्त समाचारमा सीआईबीको हवाला दिँदै तथाकथित ‘नक्कली उद्धार प्रकरण’ सम्बन्धी सामग्री प्रस्तुत गरिएको भए पनि यस कम्पनी वा कम्पनीका सञ्चालक श्री प्रेमकुमार खत्रीसम्बन्धी कुनै पनि अनुसन्धान हालसम्म नभएको जानकारी सम्बन्धित निकायसँग बुझ्दा प्राप्त भएको छ। सम्बन्धित निकाय स्वयं यस विषयमा अनविज्ञ रहेको जानकारी समेत पाएका छौँ ।”
अगाडि भनिएको छ, “यस प्रकारका समाचारहरू नियोजित रूपमा कम्पनीको प्रतिष्ठा र सञ्चालकको चरित्र हत्या गर्ने तथा आगामी फागुन २१ गते हुने निर्वाचनलाई प्रभावित पार्ने उद्देश्यले प्रकाशित गरिएको हाम्रो ठहर छ। यसप्रति कम्पनी गम्भीर आपत्ति प्रकट गर्दै यस्ता कार्यमा संलग्न पक्षविरुद्ध कानूनी उपचारको प्रक्रिया अगाडि बढाइने जानकारी गराउँछौँ ।”
