काठमाडाैँ । इलाममा जनता समाजवादी पार्टी जसपा परित्याग गरी करिब ६० जना नेपाली कांग्रेसमा प्रवेश गरेका छन् । किरात धर्मगुरु आात्मानन्द लिङदेनको क्षेत्र माङसेबुङ गाउँपालिका ५ मा शुक्रबार एक कार्यक्रमका बीच युवा नेता मदन इङ्नामको अगुवाइमा ठूलो संख्यामा जसपासहितका दल त्यागेर कांग्रेस प्रवेश गरेका हुन् ।
यो क्षेत्र इलाम २ मा पर्दछ । नेपाली कांग्रेसका उम्मेदवार भेषराज आचार्य (प्रत्यक्ष), प्रेमिका राना मगर (समानुपातिक) र जिल्ला उपसभापति खगेन्द्र देवानले उनीहरूलाई स्वागत गरेका छन् ।
एकैपटक ठूलो संख्यामा पार्टी प्रवेश गरेपछि माङसेबुङमा कांग्रेस मजबुत भएको छ । साथै भेषराज आचार्यप्रति भरोसा बढेको छ ।
यो क्षेत्रमा २०५६ सालदेखि लगातार एमालेले जित हासिल गरेको भए पनि कुनै विकास नभएको स्थानीयको गुनासो रहँदै आएको छ ।
यही मेसोमा आचार्यले विकासका लागि जस्तोसुकै कदम चाल्न तयार रहेको बताए । उनले जुनसुकै अप्ठेरा भए पनि समुन्नत इलामका लागि आफूले दिलो ज्यान लगाउने भन्दै पाँच वर्षका लागि जिताएर मूल्यांकन गर्ने अवसर दिन पनि आग्रह गरेका छन् ।
उनले आफूप्रति गरेको भरोसालाई तोड्न नदिने बताएका छन् । अलपत्र दमक चिसोपानी सडकलाई आफू निर्वाचित भएपछि कानूनी अल्झन फुकाएर कालोपत्रे गर्ने वचन पनि उनले दिए ।
यसअघिको चुनाव एमाले उपाध्यक्ष स्वर्गीय सुवासचन्द्र नेम्वाङले जित्दै आएकामा उनको निधनपछि उनकै छोरा सुहाङ नेम्वाङले ०७९ को चुनाव जितेका थिए । यसपालि भने उनलाई मुस्किल पर्ने देखिएको छ ।
