काठमाडाैँ । यही फागुन २१ मा हुने प्रतिनिधिसभा सदस्य निर्वाचनका लागि देशभरका १६५ निर्वाचन क्षेत्रमा दुई लाख २१ हजार कर्मचारी खटिने भएका छन्।
निर्वाचन आयोगका अनुसार, ७७ जिल्लाका १६५ निर्वाचन क्षेत्रका २३ हजार ११२ स्थायी मतदान केन्द्र र समानुपातिक मतको लागि मात्र सञ्चालन हुने १४३ अस्थायी केन्द्रमा कर्मचारी खटाइने व्यवस्था गरिएको छ। सहायक प्रवक्ता प्रकाश न्यौपानेका अनुसार पाँच सयभन्दा बढी मतदाता भएका केन्द्रमा नौ जना र ५०० भन्दा कम मतदाता भएका केन्द्रमा आठ जना कर्मचारी खटाइनेछ।
मतदान केन्द्रमा खटिने मतदान अधिकृत र सहायक मतदान अधिकृतलाई प्रशिक्षण दिएकोपछि, केन्द्रमा खटिने अन्य कर्मचारीलाई मतदान अधिकृतले नै प्रशिक्षण दिने व्यवस्था गरिएको छ।
निर्वाचन आयोगले बिहीबार देशभरका १६५ निर्वाचन क्षेत्रमा आवश्यक निर्वाचन सामग्री र मतपत्र वितरण भइसकेको जानकारी पनि दिएको छ।
