काठमाडौँ । संघीय राजधानी उपत्यकाअन्तर्गत पर्ने काठमाडौँ, ललितपुर र भक्तपुरका लागि नेपाली कांग्रेसका उम्मेदवारहरूले संयुक्त प्रतिबद्धता ‘भिजन १०’ आज सार्वजनिक गर्ने भएका छन्। आगामी पाँच वर्षमा उपत्यकाको दिगो विकासका लागि गरिने साझा कामको खाकासहितको प्रतिबद्धता काठमाडौँमा आयोजना हुने कार्यक्रममा सार्वजनिक गरिनेछ।
उक्त कार्यक्रमको पहल नेपाली कांग्रेसका महामन्त्री प्रदीप पौडेलको अग्रसरतामा भएको हो। काठमाडौँ क्षेत्र नम्बर ५ बाट प्रतिनिधिसभा सदस्य उम्मेदवारसमेत रहेका महामन्त्री पौडेलले उपत्यकाको समग्र विकासलाई प्राथमिकतामा राख्दै उम्मेदवारहरूबीच परामर्श गरेर साझा खाका तयार पारिएको जानकारी दिए।
उनका अनुसार संघीय राजधानीका रूपमा उपत्यकामा देखिएका यातायात, भौतिक पूर्वाधार, सहरी व्यवस्थापनलगायतका प्रमुख मुद्दाहरूमा साझा दृष्टिकोण निर्माण गरी प्रतिबद्धता सार्वजनिक गर्न लागिएको हो। “समग्र उपत्यकाको विकासको मार्गचित्र हाम्रो प्राथमिकतामा छ। एक्लाएक्लै भन्दा साझा रूपमा मुद्दा उठाउँदा प्रभावकारी हुने भएकाले संयुक्त प्रतिबद्धता सार्वजनिक गर्न लागेका हौँ,” उनले भने।
कार्यक्रममा काठमाडौँ, ललितपुर र भक्तपुरका नेपाली कांग्रेसका उम्मेदवारहरूको उपस्थिति रहने नेपाली कांग्रेस काठमाडौँका सचिव सुशन वैद्यले जानकारी दिए। कार्यक्रम आज दिउँसो १ बजे काठमाडौँको विशालनगरस्थित भाटभटेनी सुपरमार्केट परिसरमा आयोजना हुने छ।
