काठमाडौँ । कर्फ्यु जारी भएपछि रौतहट जिल्ला अदालतका सम्पूर्ण कामकारबाही स्थगित भएको छ ।
जिल्ला प्रशासन कार्यालय रौतहटले अर्को आदेश नभएसम्म गौर नगरपालिकामा अनिश्चितकालीन कर्फ्यू आदेश जारी गरेपछि अदालतले पनि सूचना जारी गरेर अदालतबाट प्रदान गरिने आजको सम्पूर्ण सेवा स्थगित गरिएको जानकारी दिएको हो ।
गौर–६ सवगढा गाउँमा शनिबार बिहान दुई समुदायबीच विवाद भएपछि शनिबार १ः०० बजेदेखि आज बिहान ६ः३० बजेसम्मका निषेधाज्ञा जारी गरिएको थियो ।
आईतबार ६ः३० बजेदेखि ८ः ३० बजेसम्म निषेधाज्ञालाई खुकुलो बनाइ प्रशासनले पुनः नगरपालिकाको पूर्व मुडबलवा गेट, पश्चिम लालबकैया बाँध, उत्तरमा बम नहर र दक्षिणमा गौर भन्सार कार्यालयभित्र बिहान ८ः३० बजेदेखि अनिश्चितकालीन कर्फ्यू आदेश जारी गरेको थियो ।
