काठमाडौँ । काठमाडौं महानगरपालिका वडा नं. १९ अन्तर्गत यटखा बहाल क्षेत्रमा स्थापना गरिएको फायर हाइड्रेन्ट पोइन्ट पाइपलाइनको उद्घाटन गरिएको छ ।
शुक्रवार वडा अध्यक्ष राजेश श्रेष्ठले औपचारिक रूपमा उद्घाटन गर्नुभएको हो । उद्घाटन कार्यक्रममा काठमाडौं महानगरपालिकाको सम्बन्धित निकायको प्रतिनिधित्व रहेको थियो ।
उद्घाटनपछि सो पाइपलाइनको व्यावहारिक परीक्षण समेत गरिएको थियो । जसमा पानीको प्रवाह तथा दबाब परीक्षण सफलतापूर्वक सम्पन्न भएको बताइएको छ । यस फायर हाइड्रेन्टको स्थापनाले यटखा बहाल तथा आसपासका बस्तीहरूमा आगलागीको घटना भएमा दमकल तथा स्थानीयवासीहरूलाई पानीको तत्काल उपलब्धता हुनेगरी आगलागी नियन्त्रणमा महत्वपूर्ण सहयोग पुग्ने अपेक्षा गरिएको छ । विगतका वर्षहरूमा काठमाडौं उपत्यकामा आगलागीका घटनाहरू बढ्दै गएको सन्दर्भमा महानगरपालिका तथा वडा कार्यालयहरूले यस्ता पूर्वाधार निर्माणलाई प्राथमिकता दिँदै आएका छन् ।
वडा अध्यक्ष राजेश श्रेष्ठले यो पूर्वाधारले स्थानीय बासिन्दाहरूको सुरक्षा बढाउने बताउँदै महानगरपालिकासँगको सहकार्यमा थप यस्ता फायर हाइड्रेन्टहरू अन्य क्षेत्रमा पनि विस्तार गरिने बताउनु भयो । गगनचुम्बी भवनहरू तथा साँघुरा गल्लीहरू भएको काठमाडौंको पुरानो बस्तीहरूमा यस्ता सुविधाको आवश्यकता निकै महशुस गरिएको छ । यटखा बहाल क्षेत्र ऐतिहासिक तथा सांस्कृतिक महत्वको रहेकोले यस क्षेत्रमा आधुनिक सुरक्षा पूर्वाधार थपिनुले स्थानीयवासीहरूमा राहतको अनुभुति भएको छ ।
