काठमाडौँ । थकाली युवा परिवारको आयोजनामा पहिलो पटक युवाहरूलाई लक्षित गर्दै अन्तरक्षेत्रीय तारा प्रतियोगिता सम्पन्न भएको छ ।
थकाली समुदायको परम्परागत खेल ‘तारा’ लाई नयाँ पुस्तामा हस्तान्तरण गर्ने उद्देश्यले आयोजित यस प्रतियोगितामा ८ वटा क्षेत्रका १२ टोलीबाट कुल ६० जना खेलाडीहरूले जनाएका हुन् ।
प्रतियोगिताको मुख्य आकर्षणको रूपमा तीन जना महिला खेलाडीहरूको सहभागिता रहेको छ । परम्परागत रूपमा पुरुषहरूको मात्र खेल मानिँदै आएको तारा खेलमा महिलाहरूको प्रवेशलाई थकाली समुदायले ’प्रोत्साहनजनक र सराहनीय’ कदमको रूपमा लिएको छ । थकाली युवा परिवारकी उपाध्यक्ष प्रज्ञा शेरचनकाअनुसार समुदायका अग्रजहरूले खेल लोप हुन लागेकोमा व्यक्त गरेको चिन्तालाई सम्बोधन गर्न यो कार्यक्रम आयोजना गरिएको बताउनु भयो । युवा पुस्ताले यस खेललाई केवल परम्परा मात्र नभई ‘करियर’को रूपमा पनि अगाडि बढाउन सकुन् भन्ने संस्थाको लक्ष्य रहेको उपाध्यक्ष शेरचनले बताउनु भयो । उहाँले आगामी फागुन १७ देखि १९ गतेसम्म मनाइने थकालीहरूको महान चाड ‘तोरन ल’ (फागु पूर्णे) को अवसरमा हुने तारा प्रतियोगितामा पनि युवाहरूको व्यापक सहभागिता रहने अपेक्षा गरिएको छ ।
थकाली युवा परिवारका अध्यक्ष मञ्जिल शेरचनले शहरीकरण र पश्चिमा खेलहरूतर्फ युवाहरूको बढ्दो आकर्षणका कारण ओझेलमा पर्दै गएको ताराखेललाई पुनर्जीवन दिन थकाली युवा परिवार, काठमाडौंले यो पहलकदमी लिएको बताउनु भयो । प्रतियोगितामा देशभरका विभिन्न ८ क्षेत्रबाट ६० देखि ७० जना युवा खेलाडीहरूको उत्साहजनक सहभागिता रहेको बताउनु भयो । मुस्ताङदेखि स्याउलीबाङ र भैरहवासम्मका थकाली युवाहरूले आफ्नो सीप प्रदर्शन गरिरहेको उहाँको भनाइ छ ।
एकदिने यस प्रतियोगितामा आकर्षक पुरस्कारको व्यवस्था गरिएको पनि बताउनु भयो । प्रथम पुरस्कारको प्रायोजन थकाली सेवा समिति नेपालले गरेको छ भने दोस्रो पुरस्कार स्वरूप ३० हजार रुपैयाँ ‘नेपाल जापान सम्पर्क समिति’ ले प्रदान गरेको छ । त्यसैगरी, तेस्रो पुरस्कार २० हजार रुपैयाँ ‘थासाङ स्पोट्र्स क्लव’ ले व्यवस्थापन गरेको छ । खेलमा उत्कृष्ट प्रदर्शन गर्ने दुई जना खेलाडीलाई ‘विशिष्ट’ र ‘उत्कृष्ट’ विधामा जनही ५–५ हजार रुपैयाँ पुरस्कार प्रदान गरिने आयोजकले जनाएको छ ।
