एजेन्सी । भारत र श्रीलंकामा जारी टी–२० विश्वकप २०२६ को आधा खेलहरु सम्पन्न भइसकेका छन् । प्रतियोगीतामा ६ टोली सुपर आठमा पुगिसकेका छन् । आयोजक भारत र श्रीलंकासहित इंग्ल्यान्ड, वेस्ट इन्डिज, दक्षिण अफ्रिका र न्युजिल्याण्ड सुपर आठमा पुगिसकेका छन् ।
समूह–डी को भर्खरै सम्पन्न खेलमा क्यानडालाई हराएर न्युजिल्याण्ड अर्को चरणमा प्रवेश गरेको हो । अब समूह ए र समूह बी बाट दुई टोली छनोट हुन बाँकी रहेको छ । समूह बीमा आयरल्याण्डलाई हराउदै जिम्बाब्वे सुपर आठमा पुगे अष्ट्रेलिया समूह चरणबाटै बाहिरिनेछ । सुपर आठमा पुग्न बाँकी टीमहरुको अंकगणित यस्तो छः
समूह एः पाकिस्तानले अन्तिम खेल जित्नैपर्ने
समूह ए बाट सह–आयोजक भारत सुपर आठमा पुगिसकेको छ । आइतबार पाकिस्तानलाई ६१ रनले पराजित गर्दै भारत सुपर आठमा पुगेको थियो । उक्त समूहमा ४ अंकसहित अमेरिका दोस्रो स्थानमा छ । पाकिस्तानको पनि चार अंक भएपनि रन रेटका कारण तेस्रो स्थानमा छ । पाकिस्तानले अन्तिम खेल नामिबियासँग खेल्न बाँकि रहेको छ । उक्त खेल जितेमा पाकिस्तान अर्को चरणमा प्रवेश गर्नेछ । तीन खेल खेलिसकेको नामिबिया भने तीनै खेल हारेर विश्वकपको रेसबाट बाहिरिसकेको छ ।
समूह बीः जिम्बाब्वे जितेमा अष्ट्रेलिया बाहिरिनेछ
समूह बी अन्तर्गत सोमबार घरेलु टोली श्रीलंकाले २०२१ को च्याम्पियन अष्ट्रेलियालाई पराजित गरेको थियो । लगातार तेस्रो खेल जितेको श्रीलंका सजिलै सुपर आठमा पुग्यो ।
समूह बीमा दुई खेल जितेको जिम्बाब्वे दोस्रो स्थानमा छ भने एक खेल जितेर दुई खेल हारेको अष्ट्रेलिया तेस्रो स्थानमा छ । अब जिम्बाब्वेले श्रीलंका र आयरल्यान्डसँग खेल्न बाँकी छ भने अष्ट्रेलियाले ओमनसँग खेल्न बाँकी छ । जिम्बावेले अन्तिम दुई खेलमध्ये एउटा पनि जित्यो भने सुपर–८ मा पुग्ने छ । अष्ट्रेलियालाई भने अर्को चरणमा पुग्न जिम्बावेले दुबै खेलमा हार बेहोर्नुपर्छ ।
समूह सीः इंग्ल्याण्ड र वेस्ट इन्डिज सुपर आठमा
समूह सीबाट सुपर आठको अंकतालिका पुरा भईसकेको छ । यस समुहबाट इंग्ल्याण्ड र वेस्ट इन्डिज सुपर–८ मा पुगिसकेको छ । यस समूहका बाँकी टोली इटाली, नेपाल र स्कटल्याण्ड समूह चरणबाटै बाहिरिएका छन् ।
समूह डीः दक्षिण अफ्रिका र न्यूजिल्याण्ड सुपर–८ मा
समूह डी अन्तर्गत मंगलबार क्यानडालाई हराएर न्युजिल्यान्ड सुपर आठमा प्रवेश गरेको छ । यस समुहबाट दक्षिण अफ्रिका तीनवटै खेल जितेर अर्को चरणमा प्रवेश गरिसकेको छ । यस समूहका बाँकी टोली अफगानिस्तान, क्यानडा र युएई समूह चरणबाट बाहिरिएका छन् ।
