काठमाडौँ। महाशिवरात्रिलाई लक्षित गर्दै पशुपतिनाथ मन्दिर क्षेत्रमा तयारी अन्तिम चरणमा पुगेको छ । पशुपति क्षेत्र विकास कोषले यस वर्षको पर्वलाई व्यवस्थित, सुरक्षित र श्रद्धालुमैत्री बनाउन बहुआयामिक योजना कार्यान्वयनमा ल्याएको जनाएको छ ।
कोषका कार्यकारी निर्देशक एवं प्रवक्ता सुभाष जोशीका अनुसार महाशिवरात्रिका दिन कम्तीमा आठ लाख दर्शनार्थीले पशुपतिनाथको दर्शन गर्ने अनुमान गरिएको छ भने करिब चार हजार साधुसन्तहरूको उपस्थिति रहने अपेक्षा गरिएको छ ।
“दर्शनार्थीको अत्यधिक घुइँचो व्यवस्थापन गर्न चार वटा छुट्टाछुट्टै लाइनमार्फत दर्शनको व्यवस्था मिलाएका छौँ”, उहाँले भन्नुभयो, “सुरक्षा, स्वास्थ्य, सरसफाइ र ट्राफिक व्यवस्थापनमा विशेष ध्यान दिइएको छ ।”
महाशिवरात्रिको दिन पशुपति क्षेत्र आसपास सवारी आवागमनमा विशेष व्यवस्थापन गरिनेछ । नेपाल प्रहरी, सशस्त्र प्रहरी बल र ट्राफिक प्रहरीको संयुक्त टोली परिचालन गरिनेछ । घुइँचो नियन्त्रण, हराएका व्यक्तिको खोजतलास, आपतकालीन उद्धार तथा शंकास्पद गतिविधि निगरानीका लागि सिसीटिभी क्यामेरा तथा मोबाइल गस्ती बढाइएको छ ।
पशुपति क्षेत्रमा प्रवेश गर्ने मुख्य नाका तथा मन्दिर परिसर वरिपरि पैदलमार्गको व्यवस्था गरिनुका साथै आपतकालीन सवारीका लागि छुट्टै मार्ग निर्धारण गरिएको कोषले जनाएको छ ।
दर्शनलाई सहज बनाउन चार वटा लाइन व्यवस्थापनका साथै ज्येष्ठ नागरिक, अपाङ्गता भएका व्यक्ति तथा विशिष्ट अतिथिका लागि छुट्टै व्यवस्था मिलाइएको कोषका कार्यकारी निर्देशक जोशीले जानकारी दिनुभयो । उहाँका अनुसार खानेपानी, शौचालय, विश्रामस्थल र प्राथमिक उपचार केन्द्रहरूको संख्या बढाइएको छ । स्वास्थ्य सेवा उपलब्ध गराउन विभिन्न अस्पताल तथा स्वास्थ्य संस्थासँग समन्वय गरिएको छ ।
कोषले स्वयंसेवक परिचालन गरी दर्शनार्थीलाई आवश्यक सूचना, सहजीकरण र मार्गनिर्देशन गर्ने व्यवस्था गरेको जनाएको छ । माइकिङ प्रणालीमार्फत भीडको अवस्था र सुरक्षासम्बन्धी सूचना निरन्तर प्रसारण गरिनेछ । महाशिवरात्रिलाई लक्षित गर्दै पशुपतिनाथ मन्दिर परिसर तथा आसपासका क्षेत्रमा वृहत् सरसफाइ अभियान सञ्चालन गरिएको छ । मन्दिर परिसर, घाट क्षेत्र, सडक र सार्वजनिकस्थलमा रङरोगन तथा सौन्दर्यकरण गरिएको छ ।
बागमती नदी किनार क्षेत्रमा विशेष सरसफाइ अभियान सञ्चालन गरी वातावरण स्वच्छ राख्न ध्यान दिइएको छ । फोहर व्यवस्थापनका लागि थप डस्टबिन राखिएको छ भने दैनिक रूपमा फोहर सङ्कलन र व्यवस्थापन गर्न विशेष टोली खटाइने जनाइएको छ ।
महाशिवरात्रिका अवसरमा नेपाल तथा भारतलगायत विभिन्न देशबाट आउने साधुसन्तका लागि अस्थायी आवास, भोजन तथा सुरक्षा व्यवस्था मिलाइएको छ । उनीहरूलाई तोकिएको स्थानमा बसोबासको व्यवस्था गरी मन्दिर परिसरको अनुशासन कायम राखिनेछ ।
महाशिवरात्रिको राति विशेष पूजाआजा, आरती, भजन–कीर्तन तथा धार्मिक प्रवचन कार्यक्रम सञ्चालन गरिनेछ । देशभरका भक्तजन पशुपतिनाथमा जम्मा भई भगवान् शिवको आराधना गर्ने परम्पराअनुसार यसवर्ष भव्य रूपमा पर्व मनाइने अपेक्षा गरिएको कोषका कार्यकारी निर्देशक जोशीले बताउनुभयो ।
कोषले श्रद्धालुहरूलाई धैर्यतापूर्वक लाइनमा बसी दर्शन गर्न, सरसफाइमा सहयोग गर्न तथा सुरक्षा निकायको निर्देशन पालना गर्न आग्रह गरेको छ । महाशिवरात्रि पर्वलाई शान्त, सभ्य र व्यवस्थित रूपमा सम्पन्न गर्न सबै पक्षसँग सहकार्य गरिएको जनाइएको छ ।
यस वर्षको महाशिवरात्रि पर्वलाई धार्मिक आस्था, सांस्कृतिक महत्व र व्यवस्थापनको दृष्टिले ऐतिहासिक बनाउने लक्ष्यसहित तयारीलाई अन्तिम रूप दिइएको कोषले जनाएको छ । रासस
