काठमाडौँ। नेपाली काँग्रेसका सभापति गगनकुमार थापाले राजनीतिक नेतृत्वमा करुणा र सहानुभूति हुनुपर्ने बताउनुभएको छ ।
शनिवार पार्टी केन्द्रिय कार्यालय सानेपामा आयोजित ‘विपद् पूर्वतयारी तथा प्रतिकार्य प्रशिक्षण’ कार्यक्रमलाई सम्बोधन गर्दै उहाँले नेतृत्वको प्रमुख गुण मानवीय संवेदना हुनुपर्ने बताउनुभएको हो ।
सभापति थापाले आगामी साउन २४ गतेदेखि पार्टीले ‘एनसी फर एनसी’ (नेप्लिज काँग्रेस फर नेसनल कज) अभियान शुरु गर्न लागेको जानकारी दिनुभयो ।
यस अभियानअन्तर्गत पार्टीका प्रत्येक नेता तथा कार्यकर्ताले वर्षभर आफूलाई कुनै न कुनै सामाजिक वा राष्ट्रिय कार्यमा संलग्न गराउनुपर्ने नीति लिइएको उहाँले स्पष्ट पार्नुभयो ।
विपद् व्यवस्थापनसम्बन्धी तालिम लिइरहेका सहभागीहरूलाई लक्षित गर्दै उहाँले यस वर्षको आफ्नो सङ्कल्प विपद् प्रतिकार्यसँग जोड्न आग्रह गर्नुभयो । आधुनिक युगमा नेतृत्वका लागि ज्ञान र प्रविधिको सीप मात्र पर्याप्त नहुने तर्क गर्नुभयो ।
सभापति थापाले भन्नुभयो, ‘एनसि फर एनसि भनेर हामीले जुन अभियान शुरु गरेका छौँ, नेपाली काँग्रेस फर नेशनल कज भनेर, यो श्रावण २४ गतेदेखि पार्टीका साथीहरूले आफ्नो काम शुरु गर्नुहुन्छ । पहिलो दिनदेखि नै हामी प्रत्येकले कुनै न कुनै एउटा कामसँग आफूलाई वर्षभरि जोड्छौँ । मेरो अनुरोध यो प्रशिक्षणमा आउनुभएका प्रत्येक साथीहरूलाई के छ भने, यो वर्षका लागि आफ्नो नेशनल कजको प्रतिवद्धता विपद् व्यवस्थापनसँग जोडेर बनाइदिनुहोस् । यहाँ सिकेका कुरालाई वर्षभरि व्यवहारमा उतार्नुहोस् । केही नभए पनि आफूले सिकेको ज्ञान अर्को चार–पाँच जनासम्म पु¥याउनुभयो भने पनि त्यो ठूलो योगदान हुनेछ । त्यसैले यहाँ आउनुभएका साथीहरूसँग हाम्रो अपेक्षा यही हो । केही दिनअघि म केही तन्नेरी साथीहरूसँग राउण्ड टेबलमा बसेको थिएँ । अनौपचारिक चिया–गफका क्रममा मैले प्रश्न राखेँ– यो शताब्दीमा यति धेरै परिवर्तन भइसकेको छ, नयाँ पुस्ता आएको छ, संसारभरि नयाँ–नयाँ आन्दोलन भइरहेका छन् । यस्तो समयमा नेतामा हुनुपर्ने सबैभन्दा ठूलो गुण के हो ? धेरै उत्तर आए–ज्ञान हुनुपर्छ, सामाजिक सञ्जाल चलाउन जान्नुपर्छ, नयाँ प्रविधि बुझ्नुपर्छ आदि । ती सबै कुरा राम्रो थिए, हामीले टिप्यौँ पनि । तर मैले भनेँ, एउटा सबैभन्दा महत्त्वपूर्ण कुरा छुटेको छ । त्यो नभएसम्म अरू सबै गुण भएर पनि आजको युगलाई चाहिने असल नेता बन्न सकिँदैन । त्यो गुण हो ? करुणा । जसको मनमा करुणा छैन, सहानुभूति छैन, उसले नेतृत्व गर्न सक्दैन । बाढी, पहिरो, खडेरी वा विपद्का बेला कसले ज्यान गुमायो, कुन किसानको बाली नष्ट भयो, कसले खान पाएन, कसलाई कस्तो पीडा भयो भन्ने महशुस गर्न सक्ने क्षमता नै नेतृत्वको आधार हो । यदि करुणा, माया र सहानुभूति हरायो भने हामी केवल मेसिनजस्ता बन्छौँ, जहाँ भ्युज र लाइक मात्र महत्त्वपूर्ण हुन्छ । मैले साथीहरूलाई भनेको थिएँ, लाइफ र लाइकबीच रोज्नुपरे लाइफ रोज्न सक्ने नेता बन्नुहोस् । लाइफ सबैभन्दा महत्वपूर्ण हो, लाइक पछि आउँछ, आए आउँछ, नआए आउँदैन । त्यसैले तपाईंहरूले विपद् व्यवस्थापनको तालिम लिँदै गर्दा यो कुरा कहिल्यै नबिर्सनुहोस् ।’
सामाजिक सञ्जालको चर्चा (लाइक) र मानवीय जीवन (लाइफ) बीचको भिन्नता उल्लेख गर्दै उहाँले भर्चुअल लोकप्रियताभन्दा नागरिकको जीवन रक्षा र सेवालाई प्राथमिकता दिन युवाहरूलाई सुझाव दिनुभयो ।
नेपाली काँग्रेस केन्द्रिय नीति, अनुसन्धान तथा प्रशिक्षण प्रतिष्ठानद्वारा आयोजित उक्त कार्यक्रममा सभापति थापाले प्रशिक्षणबाट प्राप्त ज्ञानलाई समाजको तल्लो तहसम्म पु¥याउन र विपद्को समयमा प्रभावकारी भूमिका निर्वाह गर्न प्रशिक्षार्थीहरूलाई निर्देशन समेत दिनुभयो । –न्युज एजेन्सी नेपाल
