हङकङ । हङकङको प्रहरी राष्ट्रिय सुरक्षा विभागले बुधवार बिहान एउटा अनलाइन मिडिया फर्मका छ जना बहालवाला तथा पूर्व वरिष्ठ कर्मचारीहरूलाई देशद्रोहसम्बन्धी प्रकाशन प्रकाशित गर्ने षड्यन्त्र गरेको आरोपमाू पक्राउ गरेको बताएको छ।
हङकङको प्रसारक टिभिबीले पक्राउ पर्नेमा छ जना प्रजातन्त्र समर्थक समाचार वेबसाइट स्ट्यान्ड न्यूजका वर्तमान वा पूर्व कर्मचारी रहेको बताएको छ।
प्रहरीले ३४ देखि ७३ वर्षका तीन पुरुष र तीन महिलालाई पक्राउ गरेको तथा उनीहरुको घरमा खोजतलास भइरहेको जनाएको छ ।
पक्राउ पर्नेमा स्ट्यान्ड न्युजका प्रमुख सम्पादक प्याट्रिक ल्यामसमेत रहेको समाचारमा जनाइएको छ । ल्यामलाई प्रहरीले उनको घरबाटै पक्राउ गरेको र उनको साथबाट केही ग्याजेट समेत बरामद गरेको बताइएको छ ।
स्ट्यान्ड न्यूजका अनुसार उपसम्पादक तथा हङकङ पत्रकार महासङ्घका प्रमुख रोन्सन चानलाई सोधपुछका लागि लगिएको थियो। स्ट्यान्ड न्यूजले पुलिस चानको निवासमा आइपुगेको र अदालतको वारेन्ट देखाएको भिडियो पोस्ट गरेको छ ।
“अभियोग देशद्रोही प्रकाशनहरू प्रकाशित गर्ने षड्यन्त्र थियो। यो अदालतको वारेन्ट हो र यो मेरो वारेन्ट कार्ड हो। तपाइँको फोनले हाम्रो काममा बाधा पुर्याइरहेको छ”, एक अधिकारीले भन्दै गरेको देखिन्छ ।
चानलाई पछि प्रहरीले रिहा गरेको थियो । प्रहरीले आफ्नो निवासमा खोजतलास गरेपछि जारी गरेको वक्तव्यमा उनले भने, “स्ट्यान्ड न्यूजले सधैँ व्यावसायिकरूपमा समाचार प्रकाशन गरेको छ, यो कुरामा कुनै शङ्का छैन र यो सबैलाई थाहा छ । जुनसुकै अपराधले यो तथ्यलाई परिवर्तन गर्दैन।”
हङकङको प्रहरी राष्ट्रिय सुरक्षा विभागले बुधबार अपरेसनको पुष्टि गर्दै २०० भन्दा बढी प्रहरी अधिकारीहरू संलग्न रहेको बताएको छ।
ह्युमन राइट्स वाचका चाइना निर्देशक सोफी रिचर्डसनले गिरफ्तारीको ‘राजद्रोहसँग कुनै सरोकार नभएको’ बताउनुभयो । “तिनीहरू चिनियाँ सरकारद्वारा विशुद्ध प्रतिशोध हुन्, जसले हङकङमा बेइजिङको अपमानजनक आचरणको दस्तावेजीकरण गर्ने स्वतन्त्र मिडियालाई उन्मूलन गर्न खोज्छ”, उहाँले भन्नुभयो,
“स्ट्यान्ड न्यूज, एप्पल डेली र अन्य महत्वपूर्ण आउटलेटहरू बन्द गर्दा त्यो एजेन्डा खाली हुन्छ।”
समाचार अनुसार प्रहरीले स्ट्यान्ड न्यूजको कार्यालयमा पनि छापा मारेको थियो ।
फुटपाथमा सञ्चारकर्मीलाई घेरा हालेर एक दर्जनभन्दा बढी अधिकारीको समूह बुधबार स्ट्यान्ड न्यूजको कार्यालयमा प्रवेश गरेको थियो ।
सामाजिक सञ्जालमा प्रकाशित तस्बिरहरूमा पनि पोशाक नलगाउने प्रहरी कर्मचारीले प्रकाशनको कार्यालय बाहिर प्लास्टिकको झोला ओसारपसार गरिरहेको देखाइएको छ।
सन् २०१९ मा महिनौँको सरकार विरोधी प्रदर्शनपछि बेइजिङले गत वर्ष अर्ध–स्वायत्त सहरमा व्यापक राष्ट्रिय सुरक्षा कानून लागू गरेको थियो । यसले पूर्वब्रिटिश उपनिवेशलाई वाचा गरिएको स्वतन्त्रताहरू प्रतिबन्धित गर्ने आलोचकहरुले बताएका छन् ।
सो कानूनले शहरको मामिलामा हस्तक्षेप गर्न पृथकतावाद, विध्वंस, आतंकवाद र विदेशी संगठित अपराधलाई बन्देज गरेको छ । गत वर्षको जुनमा लागू भएदेखि हालसम्म एक सयभन्दा बढी प्रजातन्त्र समर्थकलाई यो कानुनअन्तर्गत पक्राउ गरिएको छ भने धेरै विदेश पलायन भएका छन् ।
यस वर्षको सुरुमा प्रहरीले लोकतन्त्र समर्थक प्रकाशन एप्पल डेलीको कार्यालयमा छापा मारेको थियो । एप्पल डेलीको सम्पत्ति रोक्का गरिसकेपछि यसलाई बन्द गर्न बाध्य पारिएको थियो। एप्पल डेलीका मालिक जिम्मी लाइलाई एक कट्टर चीन आलोचक भन्दै गिरफ्तार गरिएको थियो र जेलमा राखिएको थियो ।
यस महिनाको सुरुमा लाइलाई चीनको सन् १९८९ तियानमेन स्क्वायर धरपकडमा पीडितहरूको सम्झनामा गत वर्ष प्रतिबन्धित भिजिलमा उनको कथित संलग्नतासँग सम्बन्धित धेरै आरोपहरूमा दोषी पाइएको थियो । मङ्गलबार प्रहरीले लाइलाई पनि देशद्रोहको आरोप लगाएको थियो । एजेन्सी
