काठमाडौँ। नेपाल प्रहरीका स्वनिम मानन्धर र नेपाल आर्मीका प्रवीण मानन्धर राष्ट्रिय काष्ठमण्डप कराते प्रतियोगिताको पुरुष एकल काताको फाइनलमा प्रवेश गरेका छन् ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहल भएको उक्त प्रतियोगिताको सेमिफाइलनमा आज स्वनिमले एपीएफका मनिष कार्की तथा प्रवीणले बागमती प्रदेशका अमृत ठोकरलाई पराजित गरे ।
उक्त स्पर्धाको महिला तर्फ एपिएफकी सन्जु देसारले बागमतीकी दीपा पुन तथा नेपाल प्रहरीकी एलिशा रास्कोटी मगरले आर्मीकी सानुमाया थिङलाई हराउदै फाइनलमा स्थान सुरक्षित गरेकी हुन् ।
नेपाल सितोरियो कराते सङ्घ, शाखा डोजो लैनचौरद्वारा आयोजित प्रतियोगिताको पुरुष र महिला टिम कातामा आर्मी र प्रहरीले उपाधि भिडन्त पक्का गरेका छन् ।
प्रतियोगिताको राखेपका सदस्य–सचिव रामचरित्र मेहताले एक कार्यक्रमबीच उद्घाटन गरेका थिए । सो अवसरमा अन्तरराष्ट्रिय पदक विजेता निरुपा दोङ तामाङ र रेहान जावेदलाई जनही रु २० हजारसहित सम्मान गरिएको थियो । कराते प्रशिक्षकत्रय राजेन्द्र कपाली, अक्बर शाह र विजयमान थापा पनि सम्मानित भए ।
प्रतियोगितामा १० टिमबाट २१० खेलाडीको सहभागिता रहेको प्रतियोगिता संयोजक रामकुमार थारुले जानकारी दिए । पुरुषमा ९ र महिलामा ८ गरी १७ स्पर्धामा समावेश छन् । टिम च्याम्पियनले रु एक लाख र उपविजेताले ५० हजार नगद पुरस्कार प्राप्त गर्ने छन् । रासस
