मिलान । गाब्रिएल जेससले दुई गोल गर्दै आर्सनललाई इन्टर मिलानमाथि ३–१ को जित दिलाएपछि आफ्नो आँखामा आँसु आएको बताएका छन्। यो जितसँगै आर्सनलले च्याम्पियन्स लिगको अन्तिम १६ मा स्थान सुरक्षित गरेको छ।
२८ वर्षीय ब्राजिलियन फरवार्ड जेसस घुँडाको एसीएल चोटका कारण ११ महिना मैदान बाहिर रहेपछि डिसेम्बरमा फर्किएका थिए। इन्टरविरुद्धको खेल उनको कमब्याकपछिको मात्र तेस्रो सुरुवाती खेल थियो।
चार सिजनदेखि आर्सनलमा रहे पनि चोटका कारण आफूले ‘एक वा डेढ–दुई सिजनजति मात्र खेलेको अनुभूति’ हुने जेससले बताएका छन्। चोटबाट फर्किएपछि उनले आफ्नो क्षमताको झल्को देखाइरहेका छन्। गत महिना एस्टन भिल्लामाथि ४–१ को जितमा उत्कृष्ट गोल गरेका जेसस इन्टरविरुद्ध भने पुरानै लयमा देखिए।
खेलपछि अमेजन प्राइमसँग कुरा गर्दै जेससले भने, “यो सपनाजस्तै रात हो। म सधैं फुटबलर बन्ने सपना देख्थें। बाल्यकालमा धेरै सेरी ए खेल हेर्थें। यही स्टेडियममा आएर गोल गर्न पाउनु मेरो लागि भावुक क्षण हो। आँखामा आँसु आयो।”
उनले ११ महिनाको चोट अवधिले जीवन र फुटबलका कठिन क्षणबाट धेरै कुरा सिकाएको बताए। “जे हुन्छ, त्यसको कुनै न कुनै कारण हुन्छ – राम्रो होस् वा कठिन।”
इन्टर मिलान बलियो टोली भएको उल्लेख गर्दै जेससले आर्सनलले खेल नियन्त्रणमा राख्दै राम्रो प्रदर्शन गरेको बताए।
“हामीले अन्तिम समयमा गोल गर्यौं र तीन अंक बटुल्यौं । अब यसलाई निरन्तरता दिनुपर्छ, किनकि विकेन्डमा अर्को महत्वपूर्ण खेल छ,” उनले भने।
जेससका यी दुई गोलसँगै उनको च्याम्पियन्स लिगमा १० खेलसम्म गोलरहित यात्रा अन्त्य भएको छ। यसअघि उनले २०२३ नोभेम्बर २९ मा लेन्सविरुद्धको ६–० जितमा गोल गरेका थिए।
यस सिजन आर्सनलका समर्थकहरू जेससलाई सुरुवात गराउन माग गर्दै आएका थिए, किनकि समरमा अनुबन्धित स्विडिस स्ट्राइकर भिक्टर ग्योकेरेसले अपेक्षित प्रदर्शन गर्न सकेका थिएनन्। यद्यपि, मिलानमा ग्योकेरेसले पनि उत्कृष्ट कर्लिङ गोल गर्दै टोलीको तेस्रो गोल गरेका थिए।
जेससले टोलीभित्र प्रतिस्पर्धालाई सकारात्मक रूपमा लिएको बताए। “म अब बच्चा होइन, २८ वर्षको भएँ। फुटबल बुझ्छु। भिकले गोल गरेकोमा म खुसी छु। काई हाभर्ट्जले मौका पाउँदा गोल गर्नेमा पनि विश्वस्त छु,” उनले भने।
यस खेलमा जेसस र ग्योकेरेस दुवैले गोल गरेपछि यो सिजन पहिलोपटक आर्सनलका दुई सेन्टर–फरवार्डले एउटै खेलमा गोल गरेका हुन्।
आर्सनलका प्रशिक्षक मिकेल आर्टेटाले जेससको प्रशंसा गर्दै भने, “हामीले गाबीलाई धेरै मिस गरेका थियौं। यसले उनको र टोलीको आत्मविश्वास बढाउनेछ। अहिले हामीसँग फरवार्ड पोजिसनमा विभिन्न विकल्प छन्।”
च्याम्पियन्स लिगमा जेससले ५३ खेलमा २६ गोल पूरा गरेका छन्। कम खेलमा २५ गोल पूरा गर्ने ब्राजिलियन खेलाडीहरूमा नेयमार (४४ खेल) र जार्डेल (४५ खेल) मात्र जेससभन्दा अघि छन्।
चारपटक च्याम्पियन्स लिग जितेका क्लेरेन्स सिडोर्फले भने, “यो खेलाडीहरूबीचको प्रतिस्पर्धा मात्र होइन। जसले खेले पनि टोलीका लागि योगदान दिनुपर्छ भन्ने सोच महत्वपूर्ण हो।”
यसैबीच, आगामी आइतबार प्रिमियर लिगमा आर्सनलसँग खेल्न जाने म्यानचेस्टर युनाइटेडका पूर्व खेलाडी वेन रुनीले भने, “यदि म गाब्रिएल जेसस भएको भए, म प्रशिक्षकलाई आइतबारको खेल म नै सुरु गर्न चाहन्छु भन्ने सन्देश दिन्थें। उनले दुई गोल गरे र उत्कृष्ट खेले।”
