काठमाडौँ । वीरगन्जस्थित सानो पाइला बचत तथा ऋण सहकारी संस्थाको रकम अपचलन मुद्दामा पर्सा जिल्ला अदालतले रास्वपा सभापति रवि लामिछानेसँग १ करोड रुपैयाँ धरौटी माग गरेको छ।
न्यायाधीश रुद्र सुवेदीको इजलासले थुनछेक बहसपछि मंगलबार लामिछानेलाई अदालतमा उपस्थित गराएर धरौटी पेश गर्न आदेश दिएको हो। तहसिलदार देवराज भट्टराईका अनुसार, धरौटी बुझाएपछि उनी रिहा हुनेछन्, नत्र पुर्पक्षका लागि थुनामा बस्नुपर्नेछ।
जिल्ला सरकारी वकिलको कार्यालयले ११ करोड ५६ लाख रुपैयाँ बिगो मागदाबीसहित जेठ ३० गते अभियोगपत्र दर्ता गरेको थियो। लामिछानेसहित २९ जनामाथि संगठित अपराध निवारण ऐन २०७० बमोजिम थप सजाय मागिएको छ।
सहकारीको रकम सानो पाइलाबाट गोर्खा मिडिया प्रालिमा १० करोड ६ लाख र नेचर हर्ब्स इन्डस्ट्रिज प्रालिमा ९५ लाख रुपैयाँ स्थानान्तरण भएको पाइएको थियो।
